«La música moza n’asturianu xorreció». Con esi títulu presenta musicasturiana.com el videu resume del II Semando Fest que yá pue vese na canal de YouTube del portal. Grabáu y realizáu audiovisualmente por Leticia Cernuda (Piloña, 1992), ye una esbilla de los preparativos y prebes de soníu, de les actuaciones musicales de Sandra Álvarez y Noemí González, Mostru l’Horru, Guieldu y Ochobre, y de la emoción y diversión d’un públicu qu’enllenó la sala Lata de Zinc na segunda edición del festival de música moza n’asturianu.
Amás del videu oficial tamién ta disponible la galería de semeyes que fizo la fotógrafa piloñesa pa captar dalgunos de los momentos d’esti eventu que dalguna xente calificó yá de «históricu» pa la música asturiana. Amás d’esto, Alderiques 2.0 yá publicó na so canal de Twitch l’alderique qu’entamó’l día anterior al conciertu con Sandra Álvarez, Natalia Menéndez d’Ochobre, Héctor Aneiros de Guieldu y Xicu Ariza de Musicasturiana.com. Fran Méndez de Mostru l’Horru nun pudo tar presente porque ta emigráu a Barcelona y taba tornando p’Asturies nesi momentu.
Musicasturiana.com y Ixuxú Cultura fueron los organizadores del Semando Fest que patrocinó la Conseyería de Cultura, Política Llingüística y Turismu, Caja Rural de Asturias, Conseyu de la Mocedá del Principáu d’Asturies y Conseyu de la Mocedá d’Uviéu; y que cuntó cola collaboración de Made in Chigre, Héroes Ensin Nome, Leticia Cernuda y Puru Remangu.
Suscríbite a les nuestres novedaes
