Yá se pueden sentir en YouTube les nueves obres del DJ d’electrónica de raigañu Fruela 757: «SXGAR_CON_XEITU» y «XOTX’L_TRAPX«. Estes pieces son l’adelantu de la que será la décima referencia d’esti productor xixonés, ‘FABRIL‘, una obra formada por 14 temes que va asoleyar esti 2022 anque tovía ensin fecha oficial de llanzamientu.
«Pa FABRIL quixi trabayar con ritmos más «trad» y melodíes propies, a parte del sampléu y el fruelismu de siempre. Ye un poco coyer lo tradicional, los instrumentos y les voces, y facelo con maquinines y sintes. La idea ye la xente diendo a les ciudaes a trabayar, cómo cambia la so vida y la so rellación col folclor y la tradición. Y cómo podría cambiar del mesmu mou lo tradicional nesi viaxe», comenta Javi Suárez, la persona detrás de Fruela 757 sobre’l so próximu trabayu.
En rellación al últimu cantar d’adelantu publicáu, «XOTX’L_TRAPX», el DJ desplica que «ye una xota onde la voz y el pelleyu son caxes de ritmos y sintes; que ye xota pero al tiempu non, ye una «xotx». Una cosina nueva, dalgo diferente, que llevaba tiempu pensando nella como comentara nesta entrevista del Anuariu de la Música Asturiana 2019». Amás, Suárez adelanta que’l próximu single va ser «una instrumental 100%, lo que sería yá lo más novedoso dentro del mundu Fruela 757».
Nueve trabayos en bandcamp
Fruela 757 ye una de les propuestes más orixinales de la música’l país. Nel so repertoriu suena ReggaeToná, HipFolk, DrumAmbás… o lo que ye lo mesmo, música popular asturiana amestada a soníos internacionales de la música urbana del sieglu XXI como’l hiphop, el reggaeton o la electrónica. El productor xixonés Javi Suárez formó esti proyectu en 2008 y hasta la fecha tien publicaos en bandcamp 9 llanzamientos, amás de delles sesiones en directo. Tamién ye’l DJ qu’acompaña y produz a Anabel Santiago nesta última dómina na que la cantante vuelve a esperimentar cola música electrónica.
Suscríbite a les nuestres novedaes
