El baille y los videoxuegos améstense nel nuevu videoclip de Fruela 757
Depués d’asoleyar los singles “SXGAR_CON_XEITU” y “XOTX’L_TRAPX“, el DJ d’electrónica de raigañu Fruela 757 llanza “SALTXN_NAGISA“, un nuevu adelantu del so próximu trabayu. Nesti nuevu videoclip, la estética de los videoxuegos vieyos y del baille asturianu únense pa dar como resultáu una orixinal pieza qu’anticipa lo que va ser ‘FABRIL‘, obra formada por 14 temes que va asoleyar esti 2022, anque tovía ensin fecha oficial de llanzamientu.
«Gustábame la idea de la “simulación” como otra parte d’esi procesu “fabril”, de mecanización, de rellación coles máquines. Quicir, yá nun baillamos, xugamos a baillar», comenta’l productor sobre la intencionalidá que ta tres del so nuevu videu. Pal DJ xixonés tou esti trabayu tien una continuidá estética: «quiero llevalo a los 70-80, que ye la época de eclosión de la electrónica, non namás a nivel musical -con soníos de sintes clásicos de la época, arreglos y demás…-, sinón tamién a nivel visual». Musicalmente, presenta esta pieza como «una instrumental 100%, lo que sería lo más novedoso dentro del mundu Fruela 757».
Otres de les novedaes que comenta Javi Suárez -persona que ta detrás de Fruela 757- en rellación a la so décima referencia ye que nella trabaya «con ritmos más “trad” y melodíes propies, a parte del sampléu y el fruelismu de siempre». «Ye un poco coyer lo tradicional, los instrumentos y les voces, y facelo con maquinines y sintes. La idea ye la xente diendo a les ciudaes a trabayar, cómo cambia la so vida y la so rellación col folclor y la tradición. Y cómo podría cambiar del mesmu mou lo tradicional nesi viaxe», desplica’l productor.
Nueve trabayos en bandcamp
Fruela 757 ye una de les propuestes más orixinales de la música’l país. Nel so repertoriu suena ReggaeToná, HipFolk, DrumAmbás… o lo que ye lo mesmo, música popular asturiana amestada a soníos internacionales de la música urbana del sieglu XXI como’l hiphop, el reggaeton o la electrónica. El productor xixonés Javi Suárez formó esti proyectu en 2008 y hasta la fecha tien publicaos en bandcamp 9 llanzamientos, amás de delles sesiones en directo. Tamién ye’l DJ qu’acompaña y produz a Anabel Santiago nesta última dómina na que la cantante vuelve a esperimentar cola música electrónica.
