Entama un fin de selmana nel que va haber una ventena d’actuaciones de música’l país repartíes per nueve eventos. Les Fiestes de los Mártires de Valdecuna (Mieres), el festival Xixón Folk, la Noche Blanca, la folixa solidaria por les 6 de La Suiza, les Xornaes d’Estudiu d’Escontra’l Raigañu, un taller de facer panderos en Llangréu y el Día’l Traxe en Grau son les distintes cites qu’hai na axenda ente güei y el domingu.. Esti ye’l resume de tola programación:
El grupu folclóricu Ruxidera y la Banda Gaites El Gumial van facer dos actuaciones nes fiestes de Valdecuna, nel conceyu Mieres. Les dos van ser el vienres 27 na esplanada de la Ermita; una a les 11h y otra a les 13h. Amás, el domingu 28 na Carpa Insierto, a les 19h, va haber un Festival de Canción Asturiana.
La Banda Gaites Saxum entama un festival nuevu nel Parque Fluvial de Viesques: Xixón Folk. La programación inclúi una nueche en danza, nueche folk, taller de baille tradicional, pasucáis, mercáu tradicional, talleres, actuaciones y otres actividaes. Van actuar el vienres 27 Grupu Folklóricu Trebeyu, BG Saxum, Soi Panderetera -alumnes de la EMT La Quintana- y Pandereteros d’Anguañu; el sábadu 28 Corquiéu; y el domingu 29 Coros y Danzas del Real Grupo de Cultura Covadonga y Rollu Folk.
Col títulu “El folclor nel Oriente. Pasáu y presente“, l’asociación Escontra’l Raigañu sigue programando xornaes dientro del so Aula didáutica de cultura popular asturiana. A lo llargo d’esti vienres y sábadu va cuntar coles persones con conocencia más fonda de la tradición del oriente del país. Ente elles, Fe Santoveña, Santi Galguera, Yolanda Cerra y Ramsés Ilesies, que van afondar en temes como’l traxe, el repertoriu de bailles y dances, la práutica de la xota y la gallegada, y los acompañamientos de percusión. La programación completa pue consultase equí
Grau acueye una nueva edición del día del traxe’l país. Col nome Indumentaria 2024 prográmase a les 13h, na Plaza los Dolores, el VIII Concursu y Muestra de Traxes Tradicionales Asturianos nel que va sonar música d’Octavio Trapiella y Dolfo Fernández. Llueu de les 17h, na Plaza’l Mercáu, va haber baille asturianu con pandereta, payel.la, gaita y tambor. Nella participen Ambás ya Ramsés, Muyeres por Grau, Raquel Álvarez ya Pablo, Roge Feito ya Clarita Braña, La Flor de Grau, Santi Galguera y el Grupu Etnográficu de l’Oriente.
Suscríbite a les nuestres novedaes
