La Conseyería de Cultura, Política Llingüística y Deporte ta acabante de dar un pasu nuevu na promoción de les llingües propies d’Asturies cola publicación nel BOPA de la resolución que regula l’usu del distintivu Alfaya, marca asturiana d’usu llingüísticu, un instrumentu destináu a reconocer y visibilizar el compromisu del texíu empresarial col asturianu y l’eonaviegu, que yá pue solicitase.
El distintivu va dexar identificar a empreses, profesionales y persones trabayadores autónomes qu’integren l’usu del asturianu o gallego-asturianu na so actividá, de la que va acreitar el so grau de compromisu llingüísticu. Nesti sentíu, la marca contempla trés niveles —inicial, intermediu y d’excelencia— que reflexen dende l’adhesión básica hasta la incorporación plena de les llingües propies na comunicación, la xestión y la rellación cola vecería. D’esta manera, profesionales que tengan rellación cola creación y interpretación musical n’asturianu, van poder adherise a esta iniciativa.
La norma publicada nel BOPA establez de forma completa’l procedimientu d’accesu al distintivu, les condiciones pa la so utilización y los derechos y obligaciones de les entidaes asociaes, afianzando asina un marcu estable y garantista pa la so implantación nel ámbitu socioeconómicu priváu y avanzando na so consideración del idioma propiu como un activu cultural y económicu p’Asturies. La iniciativa ta tamién en llinia cola defensa de les persones consumidores, qu’ampara’l fomentu de les llingües propies na información de bienes y servicios.
Amás de reconocer bones práctiques, la marca Alfaya va contribuyir a normalizar la presencia del asturianu y del eonaviegu n’ámbitos como la rotulación, l’etiquetáu, la comunicación corporativa o los entornos dixitales, favoreciendo la so utilización na actividá económica y reforciando’l so valor como elementu d’identidá y diferenciación.
Dende la Conseyería de Cultura, Política Llingüística y Deporte prevén realizar la entrega formal de los primeros distintivos nun actu entamáu nel marcu del Reguerada Fest, que Cultura entama cada añu nel conceyu de Carreño, concebida precisamente pa promocionar y dar visibilidá a les empreses qu’usen l’asturianu como llingua vehicular.
Suscríbite a les nuestres novedaes
