Yá pueden presentase a traviés de la Sede Electrónica del Principáu d’Asturies les candidatures pa poder optar a los Premios Patrimoniu Cultural d’Asturies, gallardones nuevos creaos pola Conseyería de Cultura, Política Llingüística y Deporte pa reconocer a persones y entidaes que desendolcaren un llabor destacáu na defensa, conservación, estudiu, recuperación o difusión del patrimoniu cultural. El 5 d’ochobre remata’l plazu pa poder presentase a estos premios que cuenten con diez destayes y una dotación de 1.000 euros a caúna.
Los premios pueden reconocer tanto una trayectoria continuada como una actuación concreta d’especial relevancia, pero nun pueden concedese a títulu póstumo. La convocatoria, publicada la selmana pasada nel BOPA, permite presentar candidaturas de particulares y entidaes ensin porgüeyu económicu –como asociaciones, fundaciones e instituciones—, qu’acrediten un llabor destacáu en dalguna de las siguientes categoríes, de les que munches tán venceyaes a la música de raigañu: recuperación y tresmisión de patrimoniu cultural; patrimoniu etnográficu; memoria oral; dances y bailles d’Asturies; tradiciones asturianes; cultura asturiana de la gaita; cultura quesera; cultura sidrera; cultura minera; y conocimientos y saberes venceyaos a la cultura asturiana.
Los premios tienen calter añal y van entregase cada añu a entamos d’avientu, al rodiu d’una fecha especial: el 4 d’avientu, aniversariu de la declaración de la cultura sidrera como patrimoniu cultural inmaterial pola Unesco y festividá de Sánta Bárbara, patrona de la minería. El xuráu va tar formáu por diez persones: el director xeneral de Patrimoniu Cultural, que va actuar como presidente, y nueve especialistes qu’axunten conocimientu y esperiencia nos ámbitos distintos que se premien.
Suscríbite a les nuestres novedaes
