La Dirección Xeneral d’Acción Cultural y Normalización Llingüística del Principáu d’Asturies anunció a finales del mes de marzu la convocatoria de les ayudes pa proyectos culturales singulares a desenvolver, prioritariamente, nel ámbitu rural. L’ayuda ta dotada de 300.000 euros y pueden solicitase hasta’l 27 d’abril. Proyectos musicales de distintu calter pueden presentase a esta convocatoria que vien ufiertándose dende finales del añu 2023.
Les bases de les ayudes pa proyectos culturales singulares a desenvolver, prioritariamente, nel ámbitu rural entienden «por actividaes artístiques y culturales, los espectáculos, esposiciones y actividaes comprendíes nos siguientes sectores: música, llírica, lliteratura, teatru, danza, artes plástiques, cine y audiovisuales, y videoxuegos, asina como los gastos derivaos de la execución y difusión d’estes actividaes».
D’esta manera, eventos como la organización de festivales o espectáculos musicales podríen algamar financiación con esta convocatoria que destina 150.000€ a proyectos d’entidaes ensin ánimu de llucru y 150.000€ pa empreses y profesionales, siempre qu’estos perpasen los 15.000€ de presupuestu y non subvencionando más del 80% del total d’esti. Amás, ha tenese en cuenta que los eventos fechos en conceyos con menos de 30.000 habitantes van tener una mayor prioridá.
Suscríbite a les nuestres novedaes
