Yá pue mercase Pa bail.lare de Tsacianiegas na tienda online de musicasturiana.com, na so oficina de Xixón y nel espaciu que tien esti proyectu na tienda física de Puru Remangu d’Uviéu. Esti ye’l primer trabayu del dúu formáu poles hermanes Raquel y Laura Álvarez Alonso y ta formáu por 26 pistes de les que 25 son temes nos que se fai un repasu del repertoriu del Val.le de L.laciana y zones de la redolada, como’l suroccidente asturianu. Nél pue sentise sobre manera pieces tocaes cola pandeiru cuadráu y la pandereta -amás d’otros instrumentos de percusión como castañueles y payel.la-, y munchos de los temes tán cantaos en pal.luezu, la variante dialectal del astur-lleonés falada na montaña occidental astur-lleonesa y a la que les hermanes quieren da-y visibilidá.
Esti discu naz gracies a que Tsacianiegas algamaron el Premio Música Tradicional Joven Valor 2025 del Reino de León y supón una obra mui destacada de compilación del repertoriu d’esa fastera de Lleón y Asturies. Nel llibretu apaecen les lletres de tolos temes y, según opina’l dúu, «esto ayudará a que la xente que quiera deprender los cantares lo tenga más fácil, porque esti trabayu básase na difusión y tresmisión«.
Precisamente, la tresmisión familiar tien muncho pesu en Pa bail.lare y les hermanes definen el discu como «familiar» por mor de que participen los sos pas, que foron quien-yos inculcaron dende neñes l’amor pola tradición gracies a apuntales nun grupu de baille. Amás d’ellos, al trabayu diéron-y forma’l técnicu de soníu Ángel Rodríguez del Amo -que grabó’l discu nos sos estudios Music Center León-; Ricardo Escobar, que diseñó’l CD; y Laura Rodríguez el Amo, que maquetó’l llibretu. Sicasí, nun cunta con más collaboraciones -sacantes otra- porque, como argumenten les hermanes, queríen que fuera «un proyectu de Tsacianiegas dafechu; una pareya de tocadores que lleva faciendo camín d’esta manera más de diez años».
«Hai una collaboración con un instrumentu melódicu, el whistle. Y esta escepción ye por mor de que nel álbum nun pue faltar la ‘Xota de Samiguel de Tsaciana‘», comenten Raquel y Laura Álvarez Alonso. Esta xota creáronla elles en 2014 con una melodía cedida por Héctor Álvarez Collado -fundador y miembru de los desapaecíos grupos folk l.lacianiegos Tsuniegu y Trabe- y sobre ella compuxeron coples en pal.luezu, acompañamientu de percusión con toques de pandeiru cuadráu y castañueles y ellaboraron una coreografía siguiendo la estructura tradicional del baille de la jota. Esta pieza anguaño forma parte del repertoriu de dalgunos grupos de baille tradicional de Lleón y foi versionada por bandes como Trabe (L.laciana), Los Collacios (Asturies) y Fraguel Folk (El Bierzo).
Tsacianiegas entamaron la so actividá a finales de 2008 cuando les hermanes Raquel y Laura Álvarez Alonso -venceyaes dende neñes a la música tradicional del norte de Lleón y del suroccidente asturianu- dexaron los grupos de baille y entamaron a dar actuaciones conxuntes. L’oxetivu del dúu ye tresmitir el conocimientu de los vezos y tradiciones de la so fastera y pa ello faen usu tamién de la llingua propia y de la indumentaria tradicional.
Nesti tiempu actuaron en destacaos festivales de música tradicional de dientro y fuera de L.laciana, participaron en varios proyectos audiovisuales de difusión de la cultura lleonesa y apaecieron en programes televisivos d’Asturies y Galicia.
Anque Pa bail.lare ye’l so primer discu, tienen collaborao en proyectos discográficos tan destacaos como Carombu de Xuacu Amieva, Erromeriak de Kepa Junkera o’l CD Madera, pelleyu y fierros de Música con Tsume. Tamién compartieron escenariu con Carlos Núñez y con El Nido. Cola publicación d’esti álbum, siguen afondando nesti destacáu camín pa caltener y esparder la so cultura de raigañu.
Suscríbite a les nuestres novedaes
