La Conseyería de Cultura, Política Llingüística y Deporte en collaboración cola Conseyería d’Educación y al traviés de la Sociedá Pública de Xestión y Promoción Turística y Cultural crearon apocayá’l circuitu Xira Didáctica, un proyectu d’actividaes orientaes a delles etapes educatives -con rangos específicos d’edá-. L’oxetivu ye promover, esparder y normalizar l’usu del asturianu y el gallego-asturianu ente l’alumnáu de tolos conceyos, facilitando’l so accesu a la programación cultural y didáctica nes llingües del país.
Los proyectos d’artes escéniques, música, cine, lliteratura y narración oral, divulgación patrimonial y talleres yá puen presentar les solicitudes hasta les 12h del 9 de mayu nesti enllaz. Esti procesu va resultar na ellaboración d’un catálogu dixital de propuestes pa la so programación ente’l 1 d’ochobre de 2025 y el 30 de xunu de 2026 en sales, espacios culturales o educativos y cais de los conceyos del territoriu. Con esta iniciativa quier complementase les programaciones habituales de los centros educativos asturianos, que van poder acceder a esta programación de baldre.
Amás, la convocatoria afita un presupuestu máximu por proyectu, que va ser de 2.500 € + IVA pa los espectáculos y conciertos de mediu o gran formatu, y de 800 € + IVA pa les demás actividaes. Tolos proyectos seleccionaos pa la so programación habrán presentar una guía didáctica col envís d’apurrir materiales de preparación o ampliación al personal docente. Les bases completes de la convocatoria de la Xira Didáctica pueden consultase equí.
Suscríbite a les nuestres novedaes
