Yá hai fecha oficial de llanzamientu pal octavu discu del multiinstrumentista, cantador d’asturianada y Doctor en Musicoloxía Héctor Braga. El vienres 9 de mayu va tar en toles plataformes musicales Rabil, trabayu del qu’esti músicu llangreanu yá llanzó los adelantos de ‘Llobatu‘ -n’avientu de 2023- y ‘Valiente‘ -en mayu de 2024-. L’álbum yá pue pre-guardase en Spotify pa que tea disponible nes llistes de reproducción en cuantes s’asoleye y tamién pue sentise dalgún avance curtiu a traviés del Instagram del artista.
Nesti trabayu d’Héctor Braga, producíu por Javier Blanco (Mago de Oz, Sober…), destaca’l protagonismu de la gaita rabil y la viola tecles, tal y como comentaba’l músicu nuna entrevista a Musicasturiana.com: «Vais topar música mui virtuosa, folk celta cola gaita rabil como filu conductor. Diríate qu’apaezo como’l ‘Hurdy Gurdy Man’ del cantar de Donovan, ufriendo cantares d’amor, d’épica y mitoloxía ente vertixinoses melodíes folkies».
«La gaita de rabil asturiana fala d’eternidá mesmo qu’un muérganu del tiempu» diz el músicu pa promocionar esti discu que tien nel primer planu al que considera’l so «instrumentu principal«. «Rabil ye, lliteralmente, manivela. La gaita de rabil asturiana ye pariente de la zanfoña, zarrabete o viola da roda d’otres cultures españoles: un instrumentu de bordones, tipu gaita, pero con un mecanismu de manivela que frota les cuerdes. N’Asturies tien la so propia tradición y Teodoro Cuesta dedicó-y unos versos nel sieglu XIX.», desplica Héctor Braga p’afondar nesti instrumentu. Amás del discu, el multiinstrumentista ta presentando en directo un «espectáculu de tradición y estética anovada» que reflexa la esencia de lo que va poder sentise nesti trabayu ambiciosu.
Suscríbite a les nuestres novedaes
