Los Berrones nun aparen y siguen dando novedaes del so décimu discu que va ver la lluz el 18 d’avientu, Ta too podre. Dempués d’asoleyar los cenciellos ‘Fin de mes‘ y ‘¡Vaya por Dios!‘ aporta agora un tercer adelantu: ‘Nun me llames más‘, una descarga directa d’humor, mala lleche cotidiana y la sinceridá casera que siempre acompañó al grupu.
«La canción convierte en música esa rabia reconocible de recibir llamaes nel peor momentu: cuando ún namás quier calma, un sofá, un documental na Dos y un ratu de paz que siempre se ve interrumpíu por quien menos tendría de facelo», despliquen dende Ataque 360 -axencia del grupu- al rodiu esti cantar nuevu.
Musicalmente tien «guitarres afilaes, un ritmu qu’avanza ensin frenu y un estribillu d’esos que s’agarra al instante» con una lletra que «retrata con ironía la tensión ente la tranquilidá deseada y el fastidiu de ser incordiáu, ensin perder nunca’l toque divertíu y críticu que caracterizó a Los Berrones dende los sos empiezos».
Ta too podre sal a la cai el 18 d’avientu en formatu CD y vinilu y yá pue acutase en preventa p’asina poder recibilu firmáu el día del llanzamientu xunto a dellos artículos de merchandising.
Suscríbite a les nuestres novedaes
