Tán acabante d’asoleyar dos videos en directo de L-R, el dúu de post-folk-asturianu formáu por Leticia Baselgas y Rubén Bada. Per un llau ta la so actuación en Los Conciertos de Radio 3, históricu y prestixosu programa de RTVE nel qu’actúen formaciones d’estremaos estilos -dalgo asemeyáu a lo que representaba El Club Musical na TPA, enantes de que la cadena pública cancelara la so emisión-. Per otru llau tán dos videos en vivo del proyectu La Buelga.
L’amiestu de «Veis Volver / Elizabeth O’Kelly’s» y «Bonny Light Horseman / Pasucáis del 2 de mayu» son les dos nueves pieces audiovisuales de La Buelga, una residencia artística entamada pol guitarrista irlandés Ewan Cowley. financiada pol Arts Council -l’axencia del gobiernu irlandés pal desendolcu de la cultura nesi país- y que tuvo l’oxetivu d’averar y trabayar coles músiques y cultures de los dos países celtes gracies a la participación de Leticia Baselgas y Rubén Bada. Tres de llanzar va unos meses un videu resume del proyectu, Cowley publica na so canal de YouTube estes dos nueves pieces.
Suscríbite a les nuestres novedaes
