Arranca’l fin de selmana con 16 actuaciones de música’l país

Esti fin de selmana llega cargáu de conciertos y eventos col folk, la música tradicional y les bandes de gaites como protagonistes. Grau y Villaviciosa van acoyer dos nueves ediciones del Folk in Grau y de la Nueche Celta d’El Puntal depués del ésitu de los años anteriores. Uviéu, Nava, Santu Adrianu, Llanes y Colunga van ser los escenarios de la demás programación.

Grau celebra’l XI Folk in Grau con dos díes de música y baille’l país. L’eventu entama güei vienres 12 con un pasucáis a les 21.30h y la Xuntanza Moscona a les 22h nes places de la villa, cola participación de la Banda Gaitas Conceyu Grau, la Banda Gaitas Nova Era (Galicia) y les panderetes de l’Asociación Muyeres por Grau. El sábadu 13 sigue la música con otru pasucáis a les 20h al que se sumen la Banda de Gaitas El Castro Columbrianos (El Bierzo) y el Grupu Xaréu d’Ochobre. La Plaza General Ponte va ser la llocalización del conciertu del sábadu 13 a les 22h nel que van actuar Ún de Grao y les demás bandes y grupos participantes nesta edición.

Per otru llau, la Nueche Celta d’El Puntal torna un añu más cola so tercer edición. Les puertes del Área Recreativa «El Palacio» d’El Puntal (Villaviciosa) van abrise a les 20.45h d’esti sábadu 13 pa poder esfrutar de la vuelta del míticu grupu Nuberu y les actuaciones de folk celta del grupu mozu Guieldu y el dúu Baxel. Tamién nel oriente, a les 20h, el cantautor Toli Morilla presenta’l so espectáculu Casi venti años d’insomniu na Sala Loreto de Colunga

Nel centru-occidente, Felpeyu da un conciertu a les ocho la tarde n’El Sabil de Santo Adriano y el new-trad del triu Calea -Bada, Quesada y Baselgas- va sonar na Ilesia del Monasteriu de San Salvador de Corniana (Salas) esti sábadu 13 a les 20h dientro del Festival Cultural I Milenariu. El domingu 14 nel Parque d’Iviernu d’Uviéu hai una cita coles voces y percusión tradicional de 6 Riales a les 19h.

Tres bandines

L’axenda complétenla les actuaciones de tres bandines. Esti vienres 12 toquen Xe de Jota na Plaza la Catedral d’Uviéu a les 21.30h y La Banda…La Tira! a les 18.30h en Nava. El domingu 14, Los Gascones van animar les cais d’Uviéu dende les 13h nun pasucáis dende la Plaza la Catedral hasta’l Parque d’Iviernu.

MERCA DISCOS DE LOS ARTISTES QU’ACTÚEN ESTI FIN DE SELMANA