Fai unos meses, n’avientu del añu pasáu, un conciertu del vigulineru Martin Hayes en Celoriu sorprendió a unos cuantos d’esos “frikies” que nos gusta la música folk y andamos de conciertu en conciertu y de sesión en sesión. El conciertu presentóse como la primer actividá promovida por Llar, un proyectu que buscaba dinamizar la escena folk d’Asturies al traviés de actividaes como esta. Foi una pasada; tolos que tuvimos la suerte de poder dir, vamos recordalo unos cuantos años.
Al mes siguiente, en xineru, anunciábase’l Llar Trad Fest 2024. Dende febreru, tuve la oportunidá de collaborar cola organización de Llar, y pudi dir viendo como medraba aquella idea que tanta ilusión espertó. Un eventu pensáu dende un conceptu diferente, que buscaba un espaciu pa la enseñanza del folk y la música tradicional, que perseguía poner en contactu a xente de diferentes llugares, y qu’alcontró un llugar nel que xuntar a profesores y alumnos pa pasar cuatro díes ente música y buena compañía. Fai güei dos selmanes, entamaba esi mesmu eventu.
El vienres 28 de xunu, pela tarde, fízose realidá lo que munchos llevábemos meses esperando, y que, pensándolo fríamente, nin siquiera parecía realidá. Entamó a llegar xente a La Pola Somiedo, tanto estudiantes como profesores. Puede qu’hubiese precedentes, pero paecía qu’esti eventu nun los tuvo. Voi dir desplicando por qué, pero de momentu, val con decir que, a un pueblín de poco más de 200 habitantes, y asituáu a cuasi 700 metros d’altitú, llegaron alrodiu de 300 persones ente estudiantes, músicos y otros profesionales que yeren parte d’esti festival.
«Nun s’algamó solo; hubo que facelo realidá. Costó trabayu, tanto por parte de la organización como por parte d’un equipu de 10 voluntarios qu’arrimaron el costazu pa sacalo p’alantre»
Nun s’algamó solo; hubo que facelo realidá. Costó trabayu, tanto por parte de la organización como por parte d’un equipu de 10 voluntarios qu’arrimaron el costazu pa sacalo p’alantre (gracies de nuevu a toos ellos). Tamién costó crítiques, y ye que n’Asturies tenemos una costume (o manía) de “autocriticanos” que munches veces acaba por ser una traba más qu’una ayuda. Pero fízose posible. Demostróse que ye factible facer otru modelu de festival y sumase a lo que tán faciendo n’otros llugares, a festivales que tienen por oxetivu tresmitir, y que cada vez presten más, tanto a alumnos como a profesores.
«Ún de los puntos fuertes del festival foron los conciertos en formatu pequeñu, dúos o tríos que nun suelen xuntase a tocar por ser parte de grupos distintos o nun coincidir n’axenda»
De nueche, entamaron a pasar pel escenariu conciertos “rara avis”, lo que foi ún de los puntos fuertes del festival. En formatu pequeñu, de dúos o tríos que nun suelen xuntase a tocar por ser parte de grupos distintos o nun coincidir n’axenda, pudieron esfrutase esi fin de selmana en La Pola Somiedo. Gonzalo Llao (Deira, Vrienden, G. Llao) nun dúu de bouzouki con Julio Rodríguez (Llan de Cubel, Draque, Loína), tocando pieces como «Varbishka Ratchenitza» y recordando, pola sonoridá, a esa cinta que quedó grabada del tallerín que dieron Ígor M. y Elías G. en Xixón en el añu 1998; el conciertu fue daqué que prestaría ver más veces nun escenariu. Darréu, Chuchi Cuadrado (Vallarna, Atlantic Folk Trío, etc.) sorprendió con una actuación a solu, cola so guitarra y la so voz, trayendo una buena muestra de folclor de Castiella. El gaiteru gallegu Anxo Lorenzo, xunto a Luis Nicolás (guitarra en Felpeyu, Aira da Pedra) foron los siguientes, y Felpeyu zarró esa apertura del festival faciendo lo que meyor saben facer: poner al públicu a corear los sos temes más emotivos.
El sábadu pela mañana, a les 10, entamaba bien ceo la sesión de ritmu y cantares, que se repitió los dos díes siguientes, y na que estremaos músicos asturianos como Ambás, Ramsés, Rodrigo Joglar, Santi Galguera, David Varela, etc., pasaben pel escenariu faciendo una “mañana en danza” pa calentar pal restu del día. A les once, entamaben les clases de cada especialidá. Cuatro hores dividíes en tres turnos nos que dellos profesores rotaben ente niveles, faciendo clases conxuntes nes que primaba la tresmisión oral, asina como clases tresversales de whistle pa gaiteros y gaiteres, percusión tradicional asturiana pa los alumnos de bodhrán, clases combinaes de guitarra y bouzouki, etc.
La plantiya de profesoráu… metía miéu (nel meyor de los sentíos). En xiblata, Pepín de Muñalén, Aoife Granville, Jean Michel Veillon, Michael McGoldrick y Borja Baragaño, cinco ases del instrumentu, enseñaron repertoriu, técniques, y aspectos xeográficos a más de 30 alumnos repartíos en tres niveles. En vigulín, participaron Anna-Wendy Stevenson, Simon Bradley, Lisardo Prieto y Liz Doherty. Los guitarristes pudieron esfrutar de la esperiencia con Cuchi Cuadrado, Xel Pereda y Luis Nicolás, y en bouzouki con Gonzalo Llao y Alberto Ablanedo.
En curdión, David Varela, Josephine Marsh y Xuan Nel Expósito, atendieron a un reducíu grupu d’alumnos que cuasi pue decise qu’asistieron a clases particulares. Finn Moore, Rodrigo Joglar, Borja Baragaño y Anxo Lorenzo ficieron lo propio coles clases de gaita, y l’alumnáu de whistle deprendió de Gonzalo Llao, Anxo Lorenzo, Josephine Marsh, Aoife Granville y Michael McGoldrick. Ruma Barbero y Dermot Sheedy, xunto a David Varela, foron los encargaos d’impartir les clases de bodhrán y percusión.
Como de costume últimamente, trunfó l’afluencia d’alumnáu nes clases de baille y pandereta, y contóse na más y na menos que con nueve profesores pa dar clase a los cuatro grupos que salieron. Xisco Feijoó, Cris Zagaleja, Ambás, Ramsés Ilesies, Santi Galguera, María Vázquez, Paulino Santirso y los bretones Alexandre Romieux y Marie Le Goff pusieron a tocar y a baillar a unos 70 alumnos que pela nueche siguíen entamando fileres pa baillar nos conciertos.
Tamién hubo especialidá de cantu, de la mano de Ramsés y Ambás, Cris Zagaleja, Mónica Acevedo, Janire Mañes, Xisco Feijoó y Alexandre Romieux, y un programa pa la reciella, con bona asistencia, impartíu por Mónica Acevedo y Janire Mañes, y cola participación de dellos profesores que pasaben pel aula a impartir dellos talleres o amosar el so instrumentu con un conciertín priváu: Michael McGoldrick, David Varela -que-yos preparó unes xiblates de pvc coles qu’anduvieron el restu del festival xugando y tocando-, un taller de xiblatos fechos con rames de pládanu con Ramsés y Ambás, etc.
Tamién el sábadu, fízose una nueche en danza, colos profesores que participaben nel cursu: Paulino y María, Cris Zagaleja, Ambás y Ramsés, Santi Galguera, Alexandre y Marie, y varies formaciones como Herbamora, Xuacu Amieva, y los madrileños Xara, toos ellos tocando pal baille durante más de cuatro hores.
El domingu, entamaron la nueche Josephine Marsh, Liz Doherty y Alberto Ablanedo, siguiendo con eses prestoses collaboraciones ente músicos, siguíos de Xisco Feijoó acompañáu por Sandra Costa, que recordaron que nun fai falta más qu’una pandereta, voz y remangu pa entamar una foliada, y que dieron pasu a Jean-Michel Veillon xunto a Xel Pereda. Equí, a dalgún qu’otru flautista asturianu bien conocíu saltáben-y les llárimes de la emoción. Creo que nun fai falta decir muncho más; el conciertu foi una auténtica ayalga, y nun paga la pena describilo porque eso hai que sentilo. Dempués, por si daquién quedó con ganes de postre, aportaron Simon Bradley al violín, Julio Rodríguez al bouzouki y Borja Baragaño a la flauta en una versión tríu de Llan de Cubel que punxo a vibrar la carpa del recintu ferial. Foi ún d’esos conciertos nos que paez qu’hai más instrumentos sobro l’escenariu, pero al mirar, ves que tres persones basten pa zarrar la nueche polo alto. Ye la segunda vegada que menciono esta pieza, pero volvió a sentise, de la mano d’estos tres músicos, el «Shelley’s Reel», que como se dixo una vez, foi una masterclass de vigulín en toa regla. La próxima vez que puedan asistir a presenciar esto, por favor, nun se lo pierdan.
Tolos conciertos foron mui orgánicos, ensin demasiaos ensayos previos, lo que permitió amosar l’estilu de cada músicu y l’increíble nivel qu’hai tanto dientro como fuera d’Asturies y que se dio cita en La Pola Somiedo. Tamién, cómo non, hubo sesiones, que nun dexen de ser l’alma d’estos eventos. Diferentes bares les acoyeron, y permitieron esos alcuentros nos qu’hubo alumnos y alumnes tomando una caña tranquilamente col so profesoráu de renome internacional.
«Cómo non, hubo sesiones, que nun dexen de ser l’alma d’estos eventos. Permitieron alcuentros nos qu’hubo alumnos tomando una caña tranquilamente colos sos profesores de renome internacional»
El llunes, pa rematar, abrieron la nueche Anna-Wendy Stevenson xunto a Finn Moore, Dermot Sheedy y Gonzalo Llao, mostrando de nuevo daqué digno de ver, siguíos por Felpeyu, qu’amás de abrir, tamién s’encargaron de zarrar el festival, y punxo’l ramu’l conciertu de Michael McGoldrick xunto a Luis Nicolás. Si’l día anterior Jean-Michel Veillon y Xel Pereda foron el “jazz” del festival, esti dúu foi’l rock ‘n’ roll. Dos músicos qu’encaxaron mui bien estilísticamente, creando una sinerxia mui potente. Una guitarra “a pelu”, ensin efectos, al igual que la flauta, y que retumbaben que daba gustu. Cuntaron cola collaboración de Dani Álvarez a la gaita y al bodhrán, lo único que faltaba p’amburar l’escenariu a base de caña.
Nun pueo escribir esta crónica ensin referime a la hostelería del pueblu, qu’amosó una profesionalidá irreprochable, sirviendo almuerzos, xintes y cenes, poniendo interés y disposición pa collaborar col eventu, a pesar de la lloxística y l’esfuerzu requeríos pela so parte.
«Otru de los oxetivos del festival foi proporcionar un escenariu apropiáu pa que les nueves xeneraciones se sumen a participar de la parte más viva del folk»
La barra del bar vino de la mano de Frankie Delgado, de La Cruz de Asturias, propietariu del Ca Beleño, quien amás de cerveza artesano, traxo parte d’aquel míticu mobiliariu del pub que tantes sesiones y conciertos allugó, y que pudo volver a allugar nesi fin de selmana en La Pola Somiedo: hubo tanto sesiones como slow sessions; porque otru de los oxetivos del festival foi proporcionar un escenariu apropiáu pa qu’estes nueves xeneraciones se sumen a participar de la parte más viva del folk.
Tamién hubo tres meses redondes, sobro’l resurdimientu de les músiques del mundu celta, con Liz Doherty, Anna-Wendy Stevenson, Jean-Michel Veillon y Bree Delian, sobro la xiblata de maera n’Asturies, con Michael Walsh, David Fernández, Santi Galguera, Gonzalo Llao, Pepín de Muñalén y Juan Almaraz, y una última alrodiu’l futuru de Llar y so relación con otros proyectos de sostenibilidá, con Bree Delian, Marta Fernández, Simon Bradley y colaboradores de Llar.
Llar foi, n’esos cuatro díes, un festival nel que nun pararon de pasar coses, nun paró de sentise sonar música, nun paró de pasar xente “top” pel escenariu, nun se paró de tocar, nin tan siquier en sentándose a xintar. Por supuesto, nun s’aparó, tampoco, de trabayar, nin de deprender, nin de crear nueves amistaes. Foi la ilusión de muncha xente resonando en La Pola Somiedo al traviés de la música. Foi, con too lo que queda por meyorar, mui guapo. Esperemos que pal añu que bien, vuelva a resonar, y dea esos frutos polos que tanto llevamos naguando nel folk n’Asturies.
Semeyes de Raúl Alonso.
Suscríbite a les nuestres novedaes
