El fin de selmana del 26 de xunetu, Xixón va acoyer dos folixes qu’apuesten pola música asturiana: Granda lleva celebrando 25 años les sos fiestes cola Nueche Celta y, amás, Esto ye Ciares vuelve a entamar les fiestes populares del barriu con presencia de la música’l país. Ente los dos eventos van actuar ocho grupos: Skontra, Dixebra, Rollu Folk, Grupu Folklóricu Trebeyu, Banda de Gaites Conceyu de Xixón, David Varela, L-R y Felpeyu.
Si va un mes el rock astur protagonizaba la primer nueche de les fiestes d’El Regueral (Carreño) colos conciertos de Skama la Rede y Skontra, l’AAVV Esto ye Ciares entama les Fiestes Populares del barriu apostando tamién pol rock astur. El vienres 26 a les 22h toquen Skontra y Dixebra, a medianueche. Amás, na sesión vermú de depués del repartu del bollu va sonar el grupu Rollu Folk a les 14h. A les 16.30h va haber taller de baille.
Dempués del eventu en Ciares, l’Asociación Cultural El Panderu organiza la XXV edición de la Nueche Celta de Granda cola collaboración de l’AAVV Santo Tomás de Granda, dientro de la programación de les fiestes de Santana. La parroquia de Granda anova’l so compromisu cola música tradicional y el folk con un taller de baille a les 19.30h del domingu 28 de xunetu y les actuaciones del Grupu Folklóricu Trebeyu, la Banda de Gaites Conceyu de Xixón, David Varela, L-R y Felpeyu a partir de les 21h. Una cita imprescindible cola música asturiana que lleva celebrándose cinco llustros.
Suscríbite a les nuestres novedaes
