Esta cabera edición del Festival Intercélticu de Lorient dedicóse a la mocedá de los países celtes. Paula Vega (Grupu Folclóricu Trebeyu y Abéu) y Edu Llosa (Banda Gaites Villaviciosa-El Gaitero, La Tarrancha, Alienda…) representaron a Asturies nel proyectu Interceltic Music Camp, una residencia artística que compartieron con otros catorce músicos y músiques d’Escocia, Irlanda, Isla de Mann, Gales, Cornualles, Bretaña y Galicia. Entrevistámoslos pa conocer les blimes de la so participación nesta arriquecedora esperiencia.
¿Cómo vos escoyeron pa la residencia?
Llevamos tiempu coincidiendo n’Abéu, grupu de Paula nel que yo [Edu] entamé a collaborar cola guitarra, y nel Grupu Folclóricu Trebeyu. Nel mes d’avientu participamos con Trebeyu na VII Xuntanza de Los Sones de la Navidá Asturiana onde tocamos un par de villancicos versionaos del grupu Tuenda con acompañamientu instrumental y foi la carta presentación pa que la delegación asturiana nos escoyera candidatos. Buscaben xente mozo que cantara o tocara ún o más instrumentos, entós fuimos escoyíos Paula cola voz y pandereta, y Edu cola guitarra, gaita y percusión.
¿Con quién compartistis residencia y de qué países?
Yá qu’esta edición del FIL tuvo orientada a la xente mozo de los países celtes, l’oxetivu del Interceltic Music Camp (nomóse asina’l proyectu) yera facer dos grupos formaos por músicos xóvenes de cada una de les ocho naciones celtes: Escocia, Irlanda, Isla de Mann, Cornualles, País de Gales, Bretaña, Galicia y Asturies. Cada grupu fechu tenía un representante de cada país. Nun teníemos nome más que les iniciales del Interceltic Music Camp y un númberu -1 ó 2-. Como teníemos una programación de conciertos fixa y inamovible, prescindióse de buscar nome.
«L’oxetivu del Interceltic Music Camp yera facer dos grupos formaos por músicos xóvenes de cada una de les ocho naciones celtes. Cada grupu tenía un representante de cada país»
¿Cómo funcionaron los ensayos? ¿Hubo dirección musical o foi un procesu colectivu?
Dambos grupos tuvieron rexentaos por Youn Kann y Thomas Moisson, prestixosos músicos bretones que ficieron de mediadores, ún en cada grupu, anque tuvimos muncha llibertá pa trabayar. Lo interesante foi compartir ente nós tanto la nuesa esperiencia nel mundu musical como les nueses maneres d’abordar el repertoriu de la nuesa tierra. D’esta manera, deprendimos a trabayar coles formes musicales d’otros países y otros cantares, asina como a facer arreglos dende otros puntos de vista. El procesu de composición, polo tanto, foi mui abiertu. Nunca taba nada de más, al contrario, buscábase la variedá.
«Lo interesante foi compartir ente nós tanto la nuesa esperiencia nel mundu musical como les nueses maneres d’abordar el repertoriu de la nuesa tierra. El procesu de composición foi mui abiertu»
¿Qué repertoriu trabayasteis? ¿Hubo repertoriu asturianu?
Enantes de la selmana d’ensayos, ensin conocenos de nada más, punximos en comuña cinco temes escoyíos por nós de la nuesa tierra o del nuesu instrumentu pa tener unes idees iniciales sobre les que trabayar. La idega foi facer amiestos ente pieces de cada país celta con estes propuestes o usándoles como referencia. En concreto, del repertoriu asturianu apurrimos a la gaita les muñeires de Ferreira y Batribán, Xuanin de Mieres, y la Rumba d’Ibias; a la pandereta, la Muñeira de L.larón y la Danza de Llenín. Los amiestos que surdieron con estes piezes xunto con otres d’otros países foron increíblemente bonos, nun quedando nunca un estilu o la música d’un país concretu sobresaliendo per enriba d’otra, siempre manteniendo equidá.
«Punximos en comuña cinco temes de la nuesa tierra o del nuesu instrumentu. Los amiestos que surdieron con estes pieces xunto con otres d’otros países foron increíblemente bonos, nun quedando nunca un estilu o la música d’un país concretu sobresaliendo per enriba d’otra»
Nesti procesu, ¿qué apurristis vos al restu compañeros y qué vos apurrieron les demás compañeres?
Realmente, al entamu del proyectu veíamoslo un poco inviable. Músiques y estilos mui distintos unos d’otros p’a la fin, a base de trabayar y -sobre too- ganes de facer esa xuntanza, enseña-y a la xente que nun hai fronteres na música. Trabayamos con xente d’otros países qu’acabábemos de conocer, con otres idees y conocimientos musicales, col oxetivu de preparar un repertoriu completu en cosa de 5 díes, y paeznos que marchamos toos con eses visiones tan distintes de cada ún de nós, de les nueses maneres de ver y entender la música dende onde tamos, tanto na tierra como nel panorama musical.
«Trabayamos con xente d’otros países qu’acabábemos de conocer, con otres idees y conocimientos musicales, y paeznos que marchamos toos con visiones distintes de cada ún de nós, de les nueses maneres de ver y entender la música dende onde tamos»
Amás de los ensayos, tamién distis conciertos. ¿Cuántes actuaciones distis y qué tal foi l’acoyida?
La primer selmana dedicámosla dafechu a conocenos y preparar el repetoriu con tolo apurrío de cada país. Echamos el día completu trabayando y ensayando, buscando la meyor manera d’amestar les propuestes o buscando alternatives, siempre atopando uniformidá pa que nun sobresaliera nengún estilu per enriba d’otru. Los nuesos mentores foron clave pa ello tamién. La so esperiencia musical, amás de facilitanos el trabayu, aportónos nueves idees y formes de componer y tocar. A finales d’esa selmana, dimos un conciertu priváu pa prensa y directiva xeneral a mou de prueba de cara a lo que venía dempués.
La segunda selmana, dedicámonos a amosar tolo fecho anteriormente en 12 conciertos que dimos en 6 díes, ún pela mañana y otru de tarde, alternando nos escenarios de la Plaza los Países Celtes y Les Terrasses. Dambos grupos alternábemos pa tocar ca ún nun sitiu. Foi impresionante ver tolos díes les places enllenes pa venos y la xente preguntándonos cuándo volvíemos a tocar pa volver sentinos. L’apoyu del proyectu foi increíble, en parte, pola manera en que se fizo que, obviamente, yera dalgo único.
«Los nuesos mentores foron clave. La so esperiencia musical, amás de facilitanos el trabayu, aportónos nueves idees y formes de componer y tocar»
¿Qué valoración xeneral faceis del procesu?
Foi una esperiencia única y súper motivadora pa siguir trabayando y lluchando polo nueso. Toos llogramos conocer y entender otres maneres de ver y trabayar cola música, y toes aplicables al nuesu ámbitu. Entender y comprobar que la música ye mui mui amplia y infinita, y que da igual la tierra d’onde seyas, que, como llingua universal que ye, puedes algamar lo que te propongas ensin barreres. Lorient ye, ensin duldes, la capital mundial de la música celta, y pudimos comprobalo col baruyu xente que s’arimaba día tres día a venos actuar, a ver la xuntanza multicultural que forxamos una semana enantes: xente mozo defendiendo xuntos la so música y les sos raíces. Ensin duda, dalgo único y que nun pudo motivanos más qu’a siguir trabayando por ello. Asina fadremos.
«Entendimos y comprobamos que la música ye mui amplia, y que da igual la tierra d’onde seyas, que, como llingua universal que ye, puedes algamar lo que te propongas»
¿Foi una esperiencia puntual o pue tener continuidá?
Nun se dixo que non. Puede dase más alantre una nueva xuntaza de los grupos pa dar dalgún conciertu a mou de recuerdu d’estes dos selmanes y esta edición especial del festival, anque ye dalgo difícil de compaxinar puesto que ca ún alcontrámonos nun país distintu con milenta proyectos diferentes. El proyectu fízose, grabóse y ta ehí, con una acoyía impresionante y munchu valor. Tamos mui seguros que nun va ser la última vez que nos xuntemos. Too se verá.
Si queréis destacar algo más…
Simplemente, agradecer primeramente a toles delegaciones que confiaron en nós pa esti proyectu, a tola xente que dende’l primer momentu qu’entamó esta aventura foron capaces de reuninos a toos 15 díes en Lorient y facenos la meyor estancia posible (intérpretes, mentores, coordinadores…), asina como a la directiva del FIL por tener apostao por esta iniciativa tan prestosa y tan motivadora. Y, cómo non, a tola xente que día tres día tuvo viéndonos en tolos conciertos y que nun pudieron arropanos meyor, qu’incluso dempués de venos un o dos díes tovia queríen más; ensin escaecer a la xente de casa y a Asturies, porque llegar a onde llegamos nun foi nin sedría posible ensin ellos.
Suscríbite a les nuestres novedaes
