Esta selmana entamó en Pau (Occitania) la primer residencia artística del proyectu ArC AtlantiC. Trátase d’una iniciativa entamada pola orquesta de música contemporánea más importante de Francia, Ars Nova, y pol músicu Romain Baudoin col oxetivu d’esplorar la diversidá d’influencies y identidaes culturales del Arcu Atlánticu. Nesi sen, la orquesta invitó a ocho instrumentistes de cada cultura d’esta rexón Europea y, ente elles, Asturies ta representada a traviés de Clara Diez Márquez, cantante y panderetera, fundadora de Muga y residente dende hai años en Bretaña.
«Esta selmana tamos teniendo la primer residencia artística nel centru de creación musical CERC, en Pau, onde tamos per primer vegada les ocho músiques col director d’Ars Nova y con Romain», desplica Diez Márquez. Ella alcuéntrase estos díes «confrontando llingües y repertorios pa que Romain pueda entamar a escribir el conciertu» y lo fai acompañada de Faustine Audebert y Emmanuelle Bouthillier (Bretaña), Perrine Vrignault (Poitou), Maud Herrera (Gascoña), Maider Martineau Zubieta (País Vascu), Alba Gutiérrez (Cantabria) y Fransy González (Galicia).
La componente de Muga destaca tamién que «amás de cantar», les ocho músiques van formar parte de la orquesta porque toquen toes «instrumentos como la alboka, pandereta, vigulín o guitarra eléctrica«. «Tenemos otra tanda de tres selmanes de residencia a lo llargo d’esti añu y en 2026 estrenaremos el conciertu que va tocase en caún de los llugares de procedencia de cada cantante».
Identidá común
«Hai delles collaboraciones ente territorios del mediterráneu y esta zona ta mui identificada nel ámbitu de les ‘músiques del mundu’, pero los territorios del Arcu Atlánticu nun dialoguen ente ellos, asina qu’esta ye una primera esperimentación artística dende’l prisma de la música contemporánea«, conclúi Diez Márquez sobre una iniciativa «intensa», pero de la que, asegura, «va salir una cosa guapísima». Gracies a ella Asturies sigue enachando llazos con otres cultures del mundu a traviés de la creación musical actual.
Suscríbite a les nuestres novedaes
