En 2008, Xel Pereda y Nacho Vegas xuntáronse nun proyectu qu’anticipó l’amiestu de lo tradicional y lo contemporáneo. El resultáu foi un álbum pioneru d’once cantares col mesmu nome que’l grupu que formaron, Lucas 15, asoleyáu con Lloria Discos. Va dellos meses dedicábemos-y la estaya del Discu del mes y recordábemos el fallu d’orde nos títulos que sufría la escucha en plataformes musicales. Anguaño, gracies a una nueva dixitalización de Musicasturiana.com, esi problema yá ta iguáu cola xubida d’una versión nueva del discu. Poro, los nomes de los cantares y les pistes musicales correspuéndense dafechu anguaño:
Amás de Xel Pereda (guitarra, banjo, mandolina y voz) y Nacho Vegas (voz y guitarra), Lucas 15 tamién foron Manu Molina (batería y percusiones), Luis Rodríguez (baxu) y Chus Naves (órganu, pianu y coros). Nel discu collaboraron Montse Álvarez, Fredi García, Dudu Puente, Javi Fernández, Xentiquina y les formaciones vocales Voces de Cimavilla, Orfeón Gijonés y Ochote Arbeyal.
Sacante ‘Los fayeos de Mayo’ -composición d’Ígor Medio-, ‘El Diciembre, mes glaciar’ -música de Xel Pereda- y ‘El Sacaúntos de Allariz’ -música de Nacho Vegas-, tolos temes son tradicionales, adaptaciones del grupu d’agarraos, aguilandos, romances y otros cantares en clave pop-rock alternativu. Destaquen especialmente les combinaciones de testures nes partes instrumentales y l’emplegu de los coros. Los músicos foron capaces de captar la esencia de les melodíes y los testos tradicionales pa revisitalos con una sonoridá estremada del orixe.
N’avientu de 2023 Lucas 15 volvió a sonar enriba d’un escenariu gracies a la participación de Xel Pereda en solitario dientro del ciclu Encaja2 qu’entama’l Teatru Xovellanos de Xixón. Dempués de nueve años, esti músicu interpretó, amás de ‘Los fayeos de Mayo’, versionada yá nel so discu de 2008, nueve cantares inéditos como ‘El penitente’, ‘Ónde vas pol agua’, ‘Agora non, vas cayendo’ o ‘To casamiento y mio muerte’, ente otros.
Suscríbite a les nuestres novedaes
