Yá ta en toles plataformes musicales ‘Piquena‘, el cenciellu nuevu de Tania Pereira. Ye’l primer adelantu n’asturianu del so próximu trabayu, Rousa de Xericó, y ta formáu por dos pieces independientes pero rellacionaes: la mentada ‘Piquena’ y la instrumental ‘Cuéche-my si puedis‘. Dos cortes con un tresfondu opuestu dafechu y con un soníu más esperimental que’l de los anteriores adelantos, ‘Cometas’ y ‘Chiquito’.
«‘Piquena’ fala de ser valiente y aceptar nueves etapes, dexando dir y acoyendo lo que tienes delantre, cola inxenuidá y la confianza cola que lo facíemos siendo neñes. ‘Cuéche-my si puedis’ ye la parte adulta, más escura, que siente la necesidá d’algamar llogros de siguío, siempre sintiéndonos insatisfechos«. Comenta la cantautora canguesa sobre’l conteníu d’una lletra mui personal: «Nos últimos años esforcéme en deprender demasiaes habilidaes/oficios ensin reparar dafechu en nengún porque’l final del día reducíase a coyer la guitarra y siguir escribiendo canciones. Por eso l’adulta en mí siempre anda persiguiendo la valentía de la piquena, d’ehí que dambes partes salgan xuntes«.
Amás de por esa oposición ente representar a la neña y a l’adulta, el cenciellu contién dos pistes porque, como reconoz Pereira, «nel llinguaxe de la industria musical tres minutos siempre son meyor acoyíos que cinco«. Por eso afirma que «nel dsicu va haber varios interludios instrumentales«.
«Musicalmente ye’l pasu final a esi soníu más esperimental, acullá de la figura más clasica de cantautora, onde los vientos, samples y violonchelu con delays marcaos garren más protagonismu«, desplica Tania Pereira. El resultáu son «estructures cencielles con voces cuasi susurraes, que dan una frescura envolvente al oyíu de quien lo sienta». Esti tema, al igual que’l de los anteriores singles de Rousa de Xericó, tamién ta producíu pol compositor escocés Luke Maher y amestáu por Brian Hunt (Russian Red).
Suscríbite a les nuestres novedaes
