Dende’l xueves 28 d’agostu al martes 2 de setiembre Cadavéu acueye La Regalina, eventu que tien el distintitvu de Fiesta d’Interés Turísticu y que se remonta a 1931, cuando’l Padre Galo creó esta romería n’homenaxe a la patrona d’esta llocalidá valdesana. La música’l país ta bien presente na programación pal domingu 31 axuntando actuaciones de grupos de baille tradicional, de bandes de gaites y conciertos.
La ermita de La Regalina acueye les actividaes dende primer hora la mañana. A les 11h hai un desfile tradicional, a les 12.30h báillase la Danza Prima y el Corri Corri y a les 13.30h actúen les agrupaciones de baille tradicional Coros y Danzas La Regalina, coros y Danzas Jovellanos y L’Enguedeyu. Pela tarde estos grupos vuelven a participar xunto a les bandes de gaites Castrillón, Saxum, La Reina’l Truébano y El Enxambre.
Dende les 19.30h entamen los conciertos. Toquen les formaciones femenines de música tradicional 6 Riales y Caparines y a les 22.30h Bras Rodrigo cola so propuesta de música celta protagonizada pola gaita. Orquestes y y otres actividaes completen la programación d’una fecha única nel calendariu asturianu.
Suscríbite a les nuestres novedaes
