Si el pasáu 28 de marzu Asturtralla volvió a dar, en La Traviesa de L’Infiestu, un conciertu dempués de 30 años; el próximu 17 d’ochobre vuelven a xubir al escenariu de la ciudá que nos vio nacer en 1994: Avilés. La sala Paseo Malecón va ser el llugar nel que’l grupu punk-rock va actuar a les 21.30h y les entraes anticipaes yá tán a la venta por ocho euros.
El grupu Involución va compartir cartelu cola banda de rock astur y les entraes anticipaes pueden mercase yá nestos llocales: Bar al Punto (Los Campos), Arfueyu de Fanny (Avilés), La Yomba (Piedrasblancas) y Les Aceñes (Avilés).
Con esti conciertu Asturtralla siguen presentado’l so segundu CD, Fame, Sidre y Rockangaita, nel que compilen los once temes que fueron publicando en formatu dixital dende’l 2023 y que tán repartíos en dellos EPs y cenciellos.
Asturtralla ye ún de los primeros grupos qu’hubo de punk-rock n’asturianu. Entamaron a ensayar en 1994 n’Avilés, grabaron un par de maquetes y participaron nel compilatoriu ‘Sáca-yos la Llingua‘ (1997, L’Aguañaz) colos cantares ‘Utopía Ciencia Ficción’ y ‘Na Zona Muerta’.
En 2021 regresaron asoleyando l’EP homónimu Asturtralla; al que siguió Grasa pal focicu (2023) y la publicación una serie de singles a lo llargo pasáu añu: les versiones ‘Asturies insumisa’ (‘Zapatista’, de Dixebra), ‘Nun somos nada’ de La Polla Records y ‘Ye un crimen’ d’Eskorbuto; y la composición propia ‘Les 6 de La Suiza’, cola collaboración de Reichel d’Ochobre y La Morgue y que voi votáu por los y les llectores de musicasturiana.com como’l décimu meyor cenciellu de 2025.
Suscríbite a les nuestres novedaes
