La banda gaites Gaiteros del Carbón anuncia una cita nueva y especial dientro de la celebración del so X Aniversariu. Dempués de la enorme respuesta del públicu nos dos conciertos celebraos a primeros d’añu nel Teatru José León Delestal de La Felguera, la formación decidió repetir l’espectáculu «por reclamu popular«, especialmente pola cantidá de persones que quedaron ensin poder consiguir entrada. D’esta manera, el conciertu «Equí tán… estos son» va llegar el sábadu 9 de xineru de 2027 al Teatru de La Llaboral, en Xixón, onde la formación va ufrir la «versión 2.0» del recital.
«Una nueva nueche, una nueva versión, artistes invitaos, una puesta n’escena única y un conciertu irrepetible«, son les pallabres coles que Gaiteros del Carbón presentó nes sos redes sociales esti conciertu nuevu pal que les entraes van salir a la venta’l vienres 9 d’ochobre a les 12h, al traviés de la web www.gaiterosdelcarbon.com.
La fecha nueva servirá tamién pa poner el ramu a un añu enteru d’actividaes venceyaes al X Aniversariu de Gaiteros del Carbón. A lo llargo de 2026, la formación desendolcó distintes propuestes alredor de la música, la cultura y la memoria del territoriu, con talleres y actividaes musicales, alcuentros y otres iniciatives, ente les que destacó el festival “La Pitanza” nel prau de La Chalana.
Agora, esti nuevu conciertu va cerrar el círculu d’una celebración que foi muncho más allá del escenariu y que permitió compartir con públicu y territoriu diez años de trayectoria de Gaiteros del Carbón. Nos próximos díes, la formación va dir anunciando los artistes invitaos que van participar nesta nueva cita, que va cuntar nuevamente con una propuesta escénica especialmente diseñada pa la celebración del X Aniversariu. «Una última nueche pa celebrar diez años de música, tradición, memoria y cultura asturiana», anuncia la formación de la cuenca minera p’anticipar esta destacada cita.
Suscríbite a les nuestres novedaes
