N’abril presentóse públicamente’l grupu astur-bretón TACT, cuartetu post-punk que tien como raigañu a la música tradicional asturiana y que ta encabezáu por Clara Diez Márquez. La banda va asoleyar a finales de payares Fiesta Normal, el so primer discu, y güei llancen en toles plataformes musicales l’adelantu: ‘Isabel‘.
«Ye un romance distópicu post-punk que cunta la historia d’una moza que ye espectadora de la so propia muerte. Los arreglos son evolutivos; el tema entama con un motivu rítmicu y melódicu simplificáu y repetitivu y van acumulándose distorsiones que se transformen en drones según avanza la historia», desplica Clara Díez sobre un cantar marcáu pol «noise y punk» y que l’artista define como «la canción más post-punk del discu».
‘Isabel’ forma parte de Fiesta Normal, el que va ser el primer álbum del cuartetu formáu por Clara Diez Márquez (voz), Stéphane Kerihuel (guitarra eléctrica), Thomas Felder (vigulín) y Jean-FélixHautbois (batería). Nél, destaca que la so cabezalera decidió escribir les lletres de los cantares: «tenía ganes dende va tiempu y llancémi con esti proyectu», comenta la vocalista, que tamién s’encarga de la parte gráfica y visual del discu.
«L’album sal col sellu PAGANS, que tamién editó Chants de Femmes des Asturies de Muga. Tamos percontentos d’esti acompañamientu porque ye un sellu que defende un trabayu, unes estétiques y una forma d’entender la música popular cola que tamos d’alcuerdu dafechu. Amás de trabayar con artistes qu’almiramos y que son inspiración como Sourdure, Cocanha o los desapaecíos Artùs«, añade Diez al rodiu la discográfica responsable del trabayu.
Va unos meses, la vocalista declaraba que la so intención con esta banda nueva yera «tocar en sales de conciertos y festivales de músiques actuales y amplificaes«. L’oxetivu ta cumpliéndose. En setiembre entamaron la xira y el próximu 7 de payares actúen na sala La Carène de Brest (Bretaña) xunto al pernomáu dúu post-punk Dame Area. Tres de llanzar Fiesta Normal vendrán feches nueves pa esta propuesta creada na diáspora y qu’anueva la tradición sonora del país.
Suscríbite a les nuestres novedaes
