Yá ta en toles plataformes musicales ‘LUMBRÍA – Garrucha‘, el tercer adelantu del que va ser l’estrenu discográficu d’Abéu. La formación xixonesa de música tradicional reellabora nesti tema una garrucha de Zarréu que-yos deprendió hai años Aida Mariño de Les Pites y, pa la ocasión, axúntense a Rellume, tríu mozu de pandereteres qu’entamó’l so camín l’añu pasáu. Precisamente, esti single s’asoleya güei con vistes a la celebración esti sábadu del IV Semando Fest, un eventu que tien muncho que ver na creación d’esti cantar.
«L’oxetivu cimeru de K-MUDAR ye poner en valor el relevu xeneracional na música tradicional asturiana, actualizándola y apurriendo’l nuesu enfoque. Por tou eso Rellume encaxaba como anillu al deu. Sentímonos bien reflexaos nelles: l’entamu, la ilusión, les ganes de facer, d’espresar daqué…», desplica Paula Vega d’Abéu al rodiu d’esta collaboración que, como añade, lleva tiempu trabayándose: «Coincidimos por primer vegada con Rellume l’añu pasáu nel Semando Fest. Esa mesma nueche cuando acabamos de tocar yá-yos propusimos participar nel discu. Desque empezamos a trabayar xuntos empastamos de maraviya tanto a nivel personal como a nivel vocal. Creemos qu’en ‘LUMBRÍA’ puede vese perfectamente».
Ana Feito, componente de Rellume, coincide dafechu coles pallabres de la so compañera: «Cuando surdió la posibilidá de collaborar, pensemos que qué meyor cosa que xuntanos nun tema y poner en común dambos proyeutos«. Fai un balance «perpositivu» y destaca que pa Rellume «ye una ilusión mui grande y un arguyu poder collaborar con xente mozo, pero sobre too, xente con ganes. Deprendimos d’ellos como grupu, esfrutamos del procesu compartíu y hasta d’una subida al escenariu yá nel Cachu Fest. Ver agora’l resultáu ye daqué mui satisfactorio dempués del trabayu que ficimos».
«Grabar nel estudiu foi una novedá pal proyeutu y pa les trés xuntes. Tenemos que reconocer qu’empezó a picanos el gusanín… Entá nun podemos asegurar nada, pero lo que tenemos claro ye que’l nuesu oxetivu d’esti 2026 ye volver a cantar nos micros del estudiu«, añade Feito al rodiu d’una posible vuelta a un estudiu pa grabar la so música.
Tres de publicar los adelantos ‘L.LIXEROS’, ‘AGUILANDOS‘, y agora esti ‘LUMBRÍA‘ -del que Paula Vega sorraya que «ye un tema enfocáu al baille, pensáu pa que’l públicu s’involucre, igual que’l restu del discu, porque siempre defendemos la conexón que se crea ente pandereteres y bailladores«-, Abéu siguen trabayando nel estudiu de grabación pa «dar el meyor resultáu posible». La pandereta y vocalista avanza que «entá queden munches sopreses por anunciar» y que tán «esfrutando enforma del procesu», amás de «superar toles mires» que teníen puestes nél.
Anque entá nun hai fecha de llanzamientu de K-MUDAR, Vega anuncia que van presentalu nel Teatru Auditoriu de Grau, nun «conciertu heavy con tolos collaboradores que participaron nel discu, sorpreses, bailladores…». Asina que namás queda siguir esperando a les novedaes que siga dando esti cuartetu creáu en 2018 al rodiu’l Grupu Folclóricu Trebeyu de Xixón.
Suscríbite a les nuestres novedaes
