Alan Stivell vs. Gwendal: la paternidá de la Música Celta

Anque yá hai referencies a la ‘Música Celta’ polo menos dende’l sieglu XVIII n’estudios y trataos d’historiadores, escritores y folcloristes fundamentalmente escoceses y bretones, esa espresión diba popularizase masivamente a mediaos de los años 70 del sieglu XX, cuando ye asumida por públicu y crítica pa referise, primeramente, al folk contemporaneu que se taba faciendo nos territorios consideraos celtes (aquellos que calteníen o tuvieren una llingua d’esi raigañu) y, más tarde, tamién al que se facía en Galicia y Asturies; pero más modernamente val tamién pa definir un estilu musical asépticu territorialmente onde lo primordial ye únicamente la estética sonora.

Yá nos primeros años sesenta, Sean O’Reada y The Chieftains escomiencen la xera de reellaborar en clave contemporánea la música irlandesa, iguando unos patrones que diben siguir darréu bien de músicos y formaciones d’aquel país. Pero ye en Bretaña onde diba surdir l’home fundamental pa entender el fenómenu de la denominada Primer Fola Celta que s’espardió mundialmente a finales de los 70 y primeros de los 80: Alan Stivell. Interesáu dende bien rapaz pola música tradicional bretona, la Revolución de Mayu de 1968 gárralu con 24 años, influyéndolu na so concepción política sobre Bretaña y apostando pola so autodeterminación. Les idees surdíes al abellugu d’aquella revuelta nes naciones embaxo alministración del Estáu francés, llevaríen a una rehabilitación del nacionalismu bretón, reasitiándose hacia posiciones progresistes y d’izquierda. Hasta esi momentu’l movimientu bretonista nun tenía mui bona sonadía pol escuru episodiu qu’una parte d’él protagonizaría nos años 40 al alliniase colos nazis, hasta’l puntu de que la Gwenn ha du -Blanca y negra- (bandera bretona) nun volvería a ser reivindicada popularmente hasta aquellos años. Ye’l tiempu nel que se crea’l Frente de Lliberación de Bretaña y el so brazu armáu, l’Exércitu Republicanu Bretón (en 1971 cambiaría a ‘Revolucionariu’), al que Stivell muestra’l so apoyu n’entrevistes y cantares. El multiinstrumentista, cantante y compositor bretón publicaría nel añu 1970 el discu tituláu Reflets, que sorprendería y podría les bases de lo que diba ser la so música nel futuru. Con ella como sofitu va ellaborando, álbum tres álbum, un discursu sonoru y ideolóxicu bien argumentáu y trabáu, que va espardiendo pelos países celtes, onde ye acoyíu de manera natural y gayaspera. Tamién n’Asturies, tierra que visitaría pela primer vez en 1980, afirmando la celticidá del nuestru país en declaraciones a la delegación local de TVE y a la prensa.

Pela so parte, Gwendal surde tamién en Bretaña nel añu 1972, anque les influyencies de la música tradicional d’esi país son abondo menores, como queda reflexao nel so primer álbum, Irish Jig (1974). A partir d’ehí escomiencen una carrera que llega hasta anguaño, na que desarrollen un estilu mui particular nel que’l folk amiesta col rock y el jazz. La so propuesta lléndase esclusivamente al aspectu musical, ensin que cuestiones como la llingüística tengan nenguna relevancia nellos, de fechu, l’únicu cantar que grabaron a lo llargo de tola so discografía titúlase «Danse la musique» y ta interpretáu en francés. Esto nun quita pa que, a nivel personal, nun primer momentu dellos miembros espresaren nes entrevistes interés pola política o la cuestión bretona, y tamién un cierto refugu hacia’l músicu compatriota del que falamos enantes: «Alan Stivell préstame cuando tira ciscos porque fiede» (palabres d’ún de los fundadores de Gwendal, Youenn Le Berre, a la revista asturiana Secha -númberu 3- en 1978). La so manera d’entender lo celta na creación musical daría orixe al desarrollu y espardimientu d’un estilu desterritorializáu, nel sen de que nun fai falta pertenecer a nenguna de les ocho naciones consideraes celtes (Escocia, Irlanda, Gales, Cornualles, Isla de Mann, Bretaña, Galicia y Asturies) pa poder facer y tocar «música celta», esto ye, contribuyeron a la creación d’una etiqueta comercial y al so inxerimientu na industria musical mainstream. Esto, en sí, nun ye nin bono nin malo, ye cenciellamente la constatación d’un fechu.

Puede dicise que la espresión música celta enzarra una dicotomía evidente, per un llau, val pa definir un sistema musical qu’en determinaos países «perpasa los factores estrictamente musicales y lo puramente estético, y tanto pa los sos creadores como pa bona parte de la so audiencia, convirtióse nun mediu de reivindicación llingüístico-cultural y nacional, poro, nun discursu sonoru qu’articula la identidá d’un pueblu» (como recueyo nel ensayu Hai una llinia trazada) y, per otru, sirve pa nomar una etiqueta comercial cola qu’identificar a un estilu musical onde aspectos como lo tradicional, identitario o nacional nun tienen nenguna relevancia. Na primera d’estes categoríes, la propuesta creada y desarrollada por Stivell foi crucial, mentanto na segunda la concepción estética desenvolvida por Gwendal ta nel so orixe.

Discos folk y rock a la venta na tienda