Elías García va ser recordáu en Villaviciosa

La muerte inesperada d’Elías García nel añu 2019 coyó a la escena musical del país por sorpresa y causó un impactu pergrande; la situación d’andanciu pol Covid-19 y les sos consecuencies torgaron poder entamar nengún actu de reconocencia y homenaxe a un músicu imprescindible na construcción del folk contemporaneu asturianu.

Por fin, esti fin de selmana va desenvolvese en Villaviciosa un eventu nel que se fai alcordanza d’él col nome de Xornaes Elías García. Música, páxaros, árboles. La intención de los organizadores foi la d’axuntar a lo llargo de tres díes les distintes estayes nes que trabayó y sobresalió, d’esta manera van facese conciertos, talleres, una esposición, actividaes ornitolóxiques o una acción de desocalitalización y plantación de viesca autóctona. Los actos principiaben cola inauguración hai unos díes nel Atenéu Obreru d’una muestra centrada na vida y na obra d’Elías García; ente esti vienres y el sábadu (17:00 hores) van desarrollase les VII Xornaes Ornitolóxiques Cantábriques nel mesmu sitiu, qu’inclúin ponencies, clases maxistrales y una salida pela ría maliaya; el sábadu a les 11:00 hores ta previstu un taller de dibuxu y iniciación al cuadernu de campu ornitolóxicu, dirixíu a persones de más de diez años, impartíu pol biólogu y ilustrador Gonzalo Gil; el domingu pela mañana va facese na parroquia de Seloriu una plantación d’árboles autóctonos.

En cuantes al aspectu musical, estes Xornaes Elías García van contar con dos conciertos colectivos. El primeru, el sábadu a partir de les 20:30 hores, na Plaza’l Güevu, cola participación de la Banda de Gaites Villaviciosa, Mariluz Cristóbal Caunedo, Xuacu Amieva y Ambás & Ramsés. El segundu, col que se pon el ramu a estos tres díes d’alcordanza y homenaxe, va desenvolvese’l domingu a les 19:00 hores, nel Teatru Riera, coles actuaciones de la bandina La Garrapiella, el tríu Loína (formáu por Andrea Joglar, Rodrigo Joglar y Julio Rodríguez), les pandereteres Herbamora y los grupos Llan de Cubel y Felpeyu; intérpretes y formaciones coles qu’Elías collaboró davezu o fixo parte d’elles.

Toles actividaes de les xornaes son de baldre, pudiendo apuntase nel corréu eliasxornaes@gmail.com y con tola información necesaria nel enllaz https://sites.google.com/view/xornaeselias

Discos folk y rock a la venta na tienda