Algaire versionen a Desakato con “El mio camín”, el primer adelantu de ‘Semando Son’

Yá ta en toles plataformes dixitales “El mio camín”, el primer single adelantu del compilatoriu de música moza n’asturianu, Semando Son. Les pandereteres Algaire interpreten una versión del míticu grupu Desakato cola que tresformen un cantar punk-rock nuna muñeira con toques rock. Una pieza enllena d’orixinalidá pa homenaxear a ún de los grupos más importantes de la historia de la música fecha n’Asturies; formación de Llanera qu’esti añu despídese de los escenarios tres 20 años de camín.

El primer compilatoriu de música moza n’asturianu, Semando Son, yá tien fecha de llanzamientu. El sábadu 14 d’ochobre va presentase dientro del Reguerada Fest, la feria d’empreses, cultura y gastronomía qu’entama’l gobiernu asturianu. Esti discu editáu por musicasturiana.com inclúi tres cantares inéditos de caún de los grupos que tocó na primer edición del Semando Fest: Alicia Villanueva y Luis Álvarez Pola, Loína. Algaire y Llevólu’l Sumiciu. Amás, yá pue acutase en preventa na tienda online a preciu rebaxáu: hasta’l 13 d’ochobre va costar 10 € y llueu d’esi día’l preciu va xubir a 13 €.

Nel Semando Son, compilatoriu de música moza n’asturianu axúntense 12 temes d’estilos estremaos -tonada, folk de cámara, música tradicional fusionada y electrónica de raigañu- pa reflexar la diversidá estilística de los sones del país. La característica común ye que los componentes de los grupos tienen menos de 35 años. D’esta manera, la iniciativa trata de puxar pol relevu xeneracional na música asturiana y promocionar los nomes nuevos d’esta escena; faciendo alcordanza tamién d’aquellos CDs qu’editaba Discos L’Aguañaz nos años 90 baxo’l nome de Nuevu Folk Asturianu.

L’album grabóse’l pasáu xunetu nos Tutu Estudios de Corvera baxo la producción Sergio Rodríguez, el diseñu y maquetación ye obra de la ilustradora xixonesa Cecilia Diaz y la producción executiva ye de Xicu Ariza, responsable de musicasturiana.com, proyectu qu’estrena asina la so xera discográfica. El trabayu destaca tamién porque va ufrir los primeros temes d’Alicia Villanueva, Luis Álvarez Pola y de Loína, formaciones qu’enxamás paseren pel estudiu de grabación; y porque recueye cantares inéditos d’Algaire y Llevólu’l Sumiciu.

Singles, versiones y preventa

Amás de la preventa a preciu rebaxáu, musicasturiana.com va dir asoleyando hasta’l llanzamientu adelantos del discu en plataformes dixitales y pequeñes entrevistes colos artistes participantes. Asina van dir conociéndose los detalles d’esti discu que supón tou un viaxe pela música’l país: entama per una interpretación de l’asturianada “Al Pasar El Puertu” -que grabó va 100 años La Busdonga– y remata con soníos electrónicos que sampleen a vieyes y nueves voces d’esta escena. Pel mediu va haber tamién versiones d’otros cantares de dientro y fuera d’Asturies gracies al llabor d’Alicia Villanueva y Luis Álvarez Pola, dos de los nomes que protagonicen el relevu xeneracional na tonada asturiana; Loína, tríu acústicu de folk atlánticu; Algaire, banda de música tradicional fusionada; y Llevólu’l Sumiciu, dúu qu’amesta música electrónica y asturiana

Acuta’l discu a preciu rebaxáu