Esti fin de selmana’l festival d’intervención artística en boles de silu, Porrúa en Bolas, llega a la so quinta edición. Ente les distintes actividaes programaes, la música asturiana va tener protagonismu otru añu más colos conciertos del Vermú en bolas, actividá que va entamar a les doce del mediudía y na que van actuar el dúu d’asturianada formáu por Alicia Villanueva & Luis Álvarez Pola y l’artista Ferla Megía. La cita tien entrada llibre, va ser nel prau de Llacín (na llocalidá llanisca de Porrúa) y tamién va haber paellada y puestinos pa comer y beber.
L’actividá central d’esti festival ye la tresformación de les boles nes que s’endolca’l silu (lo qu’enantes seríen los balagares) nun llenzu sobre’l qu’artistes de tendencies estétiques estremaes pinten les sos obres. La directora del festival, Nieves González, foi la ideóloga d’esti eventu que quier averar l’arte a lo rural, nesti casu al so pueblu, franciendo estereotipos y prexuicios, aprovechando les posibilidaes qu’ufierta un entornu como esi.
Suscríbite a les nuestres novedaes
