Esti fin de selmana aporta con una axenda destacada d’eventos qu’axunten una montonera d’actividaes y l’Oriente del país ye la fastera na que se van facer toles cites sacantes dos: les Xornaes Musico-Cultural del Conceyu Xixón (del día 4 al 6) y el conciertu de Lïbre nel Kuivi PopUp d’Uviéu (sábadu 5).
Los díes 4 y 5 Intriago (Cangues d’Onís) celebra una edición nueva del Maízu Rock, festival comprometíu cola música n’asturianu qu’esti añu va tener la presencia de La Morgue -formación que canta davezu nesti idioma. El vienres 4 ye la presentación de Resollu de la Banda Gaites Llacín en Llanes con un conciertu nel que van participar más de 100 músicos y van actuar tamién Felpeyu y Baxel.
L’axenda complétala’l Llaciniegu en Porrúa nel que toquen Algaire, Outru Andare, el GE L’Oriente y Llacín; Xaréu Folixa Moza en La Benéfica cola participación del Grupu Folklóricu Trebeyu y el DJ Set de Llevólu’l Sumiciu; y la Nueche Celta d’El Puntal (Villaviciosa) qu’acueye los conciertos de José Manuel Tejedor, Corquiéu y Picarós.
Tola programación detallada d’equí a los próximos meses pue vese na Axenda de Musicasturiana.com.
Suscríbite a les nuestres novedaes
