Xulio Ramos yá tien un monolitu y una plaza al so nome en La Calzada

N’agostu de 2023 finó en Xixón el cantautor Xulio Ramos, quien fuera ún de los primeros integrantes del Nuevu Canciu Astur, el movimientu musical surdíu na segunda metada de los años 70 del sieglu XX, al abellugu de l’asociación sociocultural Conceyu Bable. El músicu taba venceyáu al barriu xixonés de La Calzada dende hai décades y, tres de la so muerte, la so viuda Inés das Dores y otres personalidaes del barriu recoyeron 1.299 firmes pa que se creara una plaza y un monolitu na so alcordanza. Güei inauguróse too ello nesti espaciu qu’une les cais Bolivia, Colombia y Costa Rica. Nel actu tuvo presente’l presidente asturianu, Adrián Barbón, y l’alcaldesa de Xixón, Carmen Moriyón, ente otres persones y autoridaes.

Nacíu n’Uviéu (1949), Xulio Ramos llevaba dende cuantayá afincáu en Xixón, ciudá na que desenvolvió bona parte de la so carrera musical, de la que taba retiráu dende había años. Los sos comienzos  enriba d’un escenariu foron con quince años faciendo parte d’un ‘conxuntu’ llamáu Los Ángeles, pa depués acompañar un tiempu a formaciones como Los Junior, Los Espectros o The Lider’s; pasada esta etapa decide siguir en solitario y principia a cantar acompañáu únicamente de la so guitarra. Ye’l momentu en que s’interesa pol llabor de cantantes como’l franco-belga Jacques Brel y conoz la Nova Cançò Catalana, musicando entós -1967- testos n’asturianu como’l tituláu «Canción de la madre a unos paxarinos», del escritor maliayu Isidro Díez de la Torre (1879-1917). Treslladáu a Madrid, graba les sos primeres canciones en castellanu y preséntase al Festival de Benidorm, llogrando’l gallardón al cantante revelación. Asina, conviértese en profesional de la música, rellacionándose y participando en gales con intérpretes como Joan Manuel Serrat, Pablo Guerrero o Patxi Andión.

A mediaos de los 70 entra en contactu col Conceyu d’Asturies en Madrid y conoz a escritores como Xosé Ávarez o Fonsu Velázquez, colos que fai amistá y escomienza a collaborar, componiendo agora les sos primeres canciones en llingua asturiana. En 1975 alcuéntrase col mui mozu cantautor xixonés Carlos Rubiera, que-y enseña una de les sos primeres composiciones, «Al mio primu», de la que más tarde diría Ramos: «me di cuenta [al sentila] de que algo importante iba a pasar en el territorio de la canción cantada en asturiano» (La edad de oro de los cantautores asturianos, Manuel de Cimadevilla, 2010). N’agostu de 1975 -tres meses enantes de la muerte de Franco- participa nel eventu fundacional de lo que más tarde diba conocese como Nuevu Canciu Astur, seríen unes xornaes celebraes en La Panerona (anguaño desapaecida) del Muséu del Pueblu d’Asturies en Xixón presentaes como Nueva Canción Asturiana, nes que participen intérpretes como Manolín El Nietu Celo Xuan, Avelino, Angelines Corredera o Julio Reyero; nelles Xulio Ramos céde-y a Carlos Rubiera, que nun taba nel programa, unos minutos del tiempu de la so actuación pa qu’interpretare un par de temes, siendo la presentación oficiosa d’ésti énte’l públicu.

Yá en plena Transición, embaxo la etiqueta de Nuevu Canciu desenvuélvense bien d’actuaciones y festivales, amás d’actos de calter políticu o reivindicativu, nos que va actuar en xunto a los intérpretes integraos nesi movimientu, que nun llegaría a contar con un manifiestu fundacional (como sí ocurriría n’otres escenes asemeyaes que se daben naquel momentu n’otros territorios), nin con nengún tipu de coordinación o estructura. Sicasí, aquellos cantautores foron un pegollu fundamental nel espardimientu del nuevu discursu asturianista y na toma de conciencia llingüística. El propiu Xulio Ramos comentaba con estes palabres aquellos primeros pasos: «No resultó fácil que la gente entendiese que la lengua asturiana fuese una herramienta de comunicación que permitiese contar historias ajenas a los tópicos y lugares comunes generalmente referidos al mundo rural. No resultó sencillo sostener que los amores, las denuncias, los sueños, las aventuras o las desventuras del individuo se cuentan y se cantan en inglés, en francés, en español, en asturiano o en arameo» (La edad de oro de los cantautores asturianos, Manuel de Cimadevilla, 2010). En 1976 afíliase a la Federación Socialista Asturiana-PSOE, na que permanecería hasta la so muerte, siendo un acérrime defensor de la oficialidá del asturianu dientro d’ella toos estos años. En 1980 la Sociedad Fonográfica Asturiana, que yá llevaba funcionando dellos años, propón-y la grabación d’un discu colos cantares que llevaba tiempu interpretando n’asturianu, asina saldría’l LP -Long Play-, como se dicía naquella dómina, tituláu Esparabanes, con nueve cortes qu’incluyíen composiciones propies («A una xanina», «Heredá», «Huei llámenlu Don José», «Anuechi nun suannu», «Dende que morrió el raposu» y «Velando el to suannu»), musicalizaciones d’autores como l’avilesín Bernardo Guardado («Pa un xilgueru») o’l xixonés Alfonso Camín («El segaor») y una adaptación d’un tema tradicional («Los vaqueiros van-se, van-se»). Na grabación tuvo acompañáu por músicos perconocíos de la escena asturiana d’aquel tiempu, como’l quitarrista Óscar Robledo (acompañante avezáu de los intérpretes del Nuevu Canciu), el teclista Berto Turulla (figura fundamental de la música asturiana nesi momentu) o’l saxofonista y flautista Andrés Puente (que depués diba rexentar munchos años la tienda d’instrumentos musicales y equipos de soníu uviedina Musical Marcos). L’estilu sonoru trescurre pente la canción d’autor de la dómina, anque tien la orixinalidá de contener arreglos que remiten al folk, el rock progresivu o’l pop. El single promocional que s’esbilló del discu contenía na cara A el corte «A una xanina», que sonaría abondo nes radiofórmules que naquel intre taben apaeciendo nes ondes. Ye bien llamadera la ortografía cola qu’apaecíen los testos, que siguíen les normes propuestes pol Conceyu d’Asturies en Madrid, distintes a les emplegaes pol restu del movimientu de reivindicación llingüística, que se mandaba de les ellaboraes por Conceyu Bable. Con esti trabayu discográficu convertiríase nún de los componentes del Nuevu Canciu Astur más activos y percorrería bona parte de la xeografía asturiana actuando en festivales y sales.

Depués de too aquello diba retirase de los escenarios y dexaría toa actividá musical a lo llargo d’un tiempu, sacante la grabación d’una collaboración nun discu d’apoyu a la campaña municipal socialista de les elecciones de 1999, pal que rexistraría una versión del tema «Volver a los diecisiete» de Violeta Parra. Nel 2004 graba’l trabayu Solar d’amor y arume verde, presentada como una cantata n’alcordanza d’Andrés Solar, muertu n’accidente de coche en 1984. Esti escritor xixonés fuere bon amigu suyu, col que collaboraría nuna pequeña compañía de teatru llamada Xaréu, que tamién contaba con una parte musical; con él llegaría a representar obres curties de teatru costumista o de Pachín de Melás. Baxo la dirección musical de Carlos José Martínez, esta obra de calter sinfónicu y llíricu musica poemes d’Andrés Solar interpretaos nes voces pol tenor José Ramón Alonso, la sopranu Paula Lueje, l’Orfeón Gijonés o’l propiu Xulio Ramos, ente otros, acompañaos por una orquesta de venti músicos. Nos últimos años diba collaborar esporádicamente en trabayos discográficos d’otres formaciones y intérpretes, casu de La Capilla Antiqua o’l gaiteru Manolo Quirós.

La so voz grave y con puxu, con un timbre mui personal y característicu, apagábase esti sábadu, ameritando la reconocencia y l’agradecimientu de toes y toos aquellos que tenemos querencia pola nuestra llingua; Xulio Ramos contribuyó naquellos primeros momentos de la reivindicación a llevantar colos sos sones una conciencia amatagada mientres años na, como diría’l poeta gallegu Celso Emilio Ferreiro, llarga nueche de piedra del franquismu. Los sos cantares van quedar pa siempre no meyor de la música asturiana, cantares que falen de xanines, de segadores, de vaqueiros, d’emigrantes, de xilgueros, de raposos, de suaños… como aquel qu’encamentaba a la xente mozo a xuntar les manes na mesma xera si queríen ser llibres dientro del so país y nel qu’adelantaba la so última voluntá: «Lleváime a mio casa y echáime nel catre; abríi les ventanes, que-y entre l’orpín. Y cuando tea muertu, debaxo del horru, cavái un furacu y enterráime ellí».

Xune Elipe. Responsable de Discos L’Aguañaz / Goxe Producciones.