Asoleya “Dame un camín”, del espectáculu “El Primer Camín”
El 2 de xunu el Teatru Xovellanos de Xixón va acoyer l’espectáculu El Primer Camín, una obra escrita por Ismael Arias y producida por Michael Lee Wolfe. Los músicos Xaime Arias, Rene Ispierto, Silvia Suarez, Berto Varillas, Puri Peni, Ethan Winogrand, Marco Guardado del Valle y el propiu Lee Wolfe dan forma a esti proyectu del que yá se pue sentir en toles plataformes dixitales un cantar grabáu n’estudiu, “Dame un Camín“.
«Orixinalmente Ismael Arias ideó esti espectáculu sobre’l 2004. Llamábase Nel Camín y d’aquella taba Anabel Santiago, Liliana Castañon, Berto Varillas y dalguien más. Anque ficimos una bona xira con ello, ye de los pocos repertorios con Ismael Arias que nun tenemos grabáu», desplica Lee Wolfe, productor y músicu nel proyectu. L’astur-americanu comenta qu’esperen «grabar polo menos bona parte del repertoriu» y que decidieron entamar presentando “Dame un Camín” porque ye «l’únicu tema orixinal y na voz de Puri Penín».
En cuantes al espectáculu, Lee Wolfe sorraya que ye «un espectáculu alegre, con muncho ritmu ternariu, ritmu xota, que s’alcuentra bastante nel Camín de Santiagu». Añade que «la banda suena perguapa» y que cuenten «una bona historia con muncha gayola». El 2 de xunu nel Xovellanos de Xixón, va poder comprobase.
