Si esti branu la presencia asturiana nel Festival Internacional do Mundo Celta de Ortigueira yá foi destacada -actuaron Alienda, Guieldu, Algaire, Felpeyu, la BG La Laguna del Torollu, La Garrapiella y el GBT Trebeyu-, agora Asturies vuelve participar nún de los eventos más pernomaos de la música tradicional gallega: la Foliada da Fonsagrada. El músicu y investigador Ramsés Ilesies va dar dos obradoiros na octava edición d’esti festival y tamién van tocar L-R. Too esto produzse dempués d’un fin de selmana nel que Luar na Lubre actuaron nel Teatru de La Llaboral y xunto a ellos collaboraron Marisa Valle Roso y Héctor M. Aneiros de Guieldu.
Del 7 al 9 d’ochobre la llocalidá lucense d’A Fonsagrada acueye la VIII Foliada, un exitosu festival qu’axunta talleres, cantos de taberna, artesanía, charres, gastronomía y conciertos. L’añu pasáu yá hubo presencia asturiana col conciertu d’Algaire y esti añu vuelve a sonar la música’l país enriba l’escenariu principal gracies a l’actuación del dúu post-folk L-R, el vienres 8 a les 23 hores. Amás, el xueves 7 Ramsés Ilesies va espardir pel país vecín más aspectos rellacionaos cola cultura asturiana: a les 16h va dar un taller d’Aniciu a la percusión asturiana y darréu otru alredor de Los Vaqueiros d’Alzada.
Nun ye la primer vez qu’esti añu tendiéronse estos pontes musicales ente Galicia y Asturies. Amás del mentáu casu d’Ortigueira, el pasáu marzu cellebróse na uvieína Lata de Zinc l’Alcuentru Trad-Urbán qu’axuntó les músiques populares de los dos países. Y tovía esti sábadu la mítica banda de folk celta gallegu Luar Na Lubre actuó nel Teatru de La Llaboral de Xixón y convidó a dos artistes asturianos a collaborar: Marisa Valle Roso punxo voz a «Camariñas» y «Romeiro», mientres que’l componente de Guieldu, Héctor M. Aneiros, tocó’l whistle en «The Sailor’s Hornpipe/Pasacorredoiras«. Son exemplos de lo arriquecedora que ye la diversidá cultural y la interrellación ente pueblos.
Suscríbite a les nuestres novedaes
