Un tema de La Polla Records vuelve a sonar n’asturianu. Dempués de la reinterpretación de ‘Ensin salida‘ que fizo’l propiu grupu pal discu L’Asturianu Muévese y de les versiones de ‘Tumba 37‘ y ‘Fin de sieglu‘ que ficieron Skama la Rede y La Tarrancha nel Tributu a La Polla dende Asturies; llega’l momentu d’Asturtralla. La formación punk-rock escueye amás el gran himnu del grupu vascu: ‘Nun somos nada‘ y fáilo pa homenaxear a Xosé Avilés, el gaiteru orixinal d’esti cantar.
«Xose foi quien grabó la gaita con La Polla Records nel discu de ‘No somos nada’ de 1986» -desplica Xelu Estébanez, cabezaleru d’Asturtralla- «Él yera collaciu míu, morrió en 2016 por un cáncer de pulmón y esta ye la mio manera de face-y un homenaxe; dedicándo-y esta versión». Amás, el cantante tamién sorraya que nesti tema foi la primer vez que sintió «una gaita nun cantar punk-rock», asina que ye otra de les razones pa versionar esti clásicu del Rock Radikal Vascu.
El single ye’l segundu d’una serie de tres versiones qu’asoleya la banda. La primera foi ‘Asturies Insumisa‘ col que reinterpreten ‘Zapatista’ de Dixebra; agora publicaron ‘Nun somos nada’ y el próximu va ser ‘Ye un crimen’ d’Eskorbuto. Tolos temes tán grabaos nos Tutu Estudios de Corvera y nellos collaboren Isra Sánchez (ex Dixebra, ex El Sueño de Morfeo) a la batería y José Manuel Tejedor a la gaita.
Suscríbite a les nuestres novedaes
