Pasaron siete años desque D’Urria s’estrenó dientro de la escena musical n’asturianu con En ca pla, un discu de que tuvo perbona acoyida y convirtió a esta formación l.lacianiega nuna de las más interesantes de la fornada nueva folk. Agora, el proyectu encabezáu por José Manuel Sabugo Sabu torna con De Fuentesila a Primóu, un EP formáu por tres temes qu’anticipa lo nuevo no que ta trabayando la formación.
El llanzamientu ta formáu por tres temes: ‘Redondo’ -que ta acompañáu d’un videoclip-, ‘Xeitos’ y ‘Ñoceda’. El primeru d’ellos, «cantábase en Matalavil.la (Ribas del Sil), dende fai muitísimos años, ya que yía mui especial pa la xente d’esti pueblu ya la súa contorna. Ningun beil.le del Cristu en Matalavil.la acabóu ensin cantar ‘Redondo’«, desplica Sabu al rodiu la pieza. Per otru llau la escritora Eva González de Palacios del Sil pon lletra al poema que da forma a ‘Xeitos’: «fala cumo naide, de las nuesas costumes ya de la nuesa identidá, ya que yía cumo un himno pa nós», afonda’l músicu y cantante de D’Urria. L’EP complétase con un cantar de Ñoceda del Bierzo que Sabu deprendió «fai muitos años» de los sos «padrinos musicales nel folk: Aira da Pedra«.
«En común tien el nuesu sentir ya’l nuesu xeitu de cantar ya cuntar hestorias, falar de la nuesa xente ya transmitir lo nuesu de la mechor manera que sabemos», desplica Sabugo sobre estos tres cantares nuevos. Tamién rescampla como principal diferencia «el númberu de componentes del grupu; agora somos ocho» y «l’empaste y armonía entre nós, que yía lo más guapo». Amás de los músicos habituales D’Urria tamién s’arrodió de les collaboraciones de Vero González y Natalia Vega (6 Riales) a les voces y coros; Mario González al rabel; de Luis Senén Fernández (tamién productor del EP) con dellos instrumentos y de Jose Manuel Pérez Castro a la gaita.
«Subimos agora estos tres primeiros temas y vamos siguir subiendo según vayamos grabando ya terminando temas», desplica’l cabezaleru de D’Urria sobre los próximos pasos de la so formación. Amás, sorraya que pel momentu nun piensen «en discu físicu hasta que nun tean toos grabaos». Menanto, la publicación de De Fuentesila a Primóu ye un reflexu del bon facer que caltién la formación más representativa del folk fechu en L.laciana.
Suscríbite a les nuestres novedaes
