Varies son los conciertos que grupos de música n’asturianu dan acuyá de les nuestres llendes. Sicasí, son menos los eventos que s’entamen perdayuri y nos que los sones del país son los protagonistes. Esti fin de selmana coincidió que van celebrase dos d’estes característiques: el Primer Encuentro Folk n’Asturianu qu’entama’l sábadu el Centru Asturianu de Castelló y l’Aperitivo Folk Celta y Micro Abierto qu’organiza’l domingu l’asociación La Curuxina de Madrid.
El Centru Asturianu de Castellò y Folixeros del Mediterráneu entamen esti sábadu dende les 17h nel llocal que tienen los primeros el Primer Encuentro Folk n’Asturianu. Dientro de la programación va haber talleres de pandereta, clases d’iniciación de gaita, baille pa toles edaes y un amagüestu. L’eventu tien la participación de la Banda de Gaitas de Castelló, la Casa de Asturias de Valencia y el Centro Asturiano de Tarragona.
D’otra banda, La Curuxina -asociación cultural y banda de gaita asturiana de Madrid– organiza’l domingu 30 dende les 13h na sala Gruta 77 de Carabanchel l’Aperitivo Folk Celta y Micro Abierto. «Cuntaremos con collacios, que son grandes personas y fantásticos músicos, qu’aporten dende Asturies para disfrutar d’esti plan tan prestosu con toos», comentó’l colectivu nes sos redes sociales, anunciando a la par dalgunos de los nomes que van tar enriba l’escenariu: Dani Álvarez, Pelayo Suárez, Celia Nieto, Julio Rodríguez, Irene Vioque, David Fernández, Guillermo Zumajo y Iratxe Espina.
Estos dos eventos son una demostración de lo importante que ye la diáspora asturiana y el so llabor cuando s’organicen pa caltener y esparder la música y la cultura del país.
Suscríbite a les nuestres novedaes
