Buír vuelven a Xixón, la ciudá onde dieron el so primer conciertu. El tríu formáu por Xosé Ambás, Vero Rubio y Pepín de Muñalén estrenóse en directo’l pasáu mes de payares dientro del Ciclu de Folk de Cámara Ígor Medio, nuna cita qu’escosó l’aforu y pa la que quedó una montonera xente ensin poder velos a les puertes del Muséu Casa Natal de Xovellanos. Esti xueves 28 de mayu a les 19.30h hai una oportunidá nueva pa ver a esti tríu na villa de Xovellanos.
L’escenariu ye’l Patiu del Centru de Cultura Antiguu Institutu, como parte de los XIV Alcuentros de Músiques Asturianes qu’entama la FMCEyUP de Xixón y el Serviciu de Normalización Llingüística nel Conceyu. Ellí va poder vese la propuesta d’esti tríu que recueye y revisa la tradición asturiana trayéndola a la época actual. El so reportoriu sigue la filosofía del grupu Tuenda nel que l’Archivu de la Tradición Oral d’Ambás (ATOAM) apurre los materiales, munches veces inéditos, del so trabayu de campu. Un repertoriu variáu a nivel llingüísticu, xeográficu y temáticu.
La de Buír ye asina una apuesta novedosa na qu’Ambás y Pepín, vieyos compañeros de Tuenda, s’arimen al trabayu brillante de Vero al pianu. A comuña ufren «un repertoriu novedosu y tranquilu pa escuchar, pa tar sentadinos y sentir la música del país vestida con flauta, pianu y voz«, como declaró Ambás a MUSICASTURIANA.COM enantes del estrenu del proyectu. Esti xueves van defendelo de nuevo en Xixón nel marcu d’una xira que los va llevar tamién el vienres 5 de xunu al Muséu del Oriente d’Asturies (Porrúa) y el sábadu 27 al Teatru La Lechera de Cancienes (Corvera).
Hasta’l vienres 12 de xunu van siguir celebrándose tolos xueves a les 19.30h la XIV edición de los Alcuentros de Músiques Asturianes. El 2 de xunu actúen Mapi Quintana y Marcos Baggiani, nuna propuesta que mezcla poesía, sensibilidá vocal y percusión contemporánea. El 4 de xunu xuben al escenariu Ún de Grao y Rodrigo Martínez con una propuesta que nel diálogu ente instrumentos tradicionales y arreglos contemporáneos, con un fondu que bebe de la música de raigañu asturianu pero que busca nueves formes d’espresión.
El 9 de xunu ye’l momentu de Alicia Villanueva xunto a Carlos Velasco, que van llevar a escena l’asturianada, siendo dambos campeones del Premiu d’Asturianada Obdulia Álvarez «La Busdonga» y 12 de xunu el ciclu despídese’l cola propuesta A BAILLAR: Tarde en danza al mou Xixón, una xornada qu’entemez música y danza tradicional. Inclúi un taller de baille a les 19h de Nel Villanueva acompañáu por Muyeres por Grau, siguíu del conciertu de Leirana (proyectu nuevu de Nel Villanueva) a les 20h y l’actuación final de María Trubia xunto a Pau Santirso a les 21:15h.
Suscríbite a les nuestres novedaes
