Yá ta en plataformes lo nuevu de Corquiéu. Tres la so vuelta a los escenarios en setiembre del añu pasáu, el grupu amosa esti material nuevu en forma d’EP de tres temes.
«El Zanjón», asina ye’l títulu del EP, ye’l nome del barriu de Cangues d’Onís onde nació la madre de Rigu Suárez, gaiteru del grupu. Ye tamién el nome del primer tema: un set qu’inclúi una muñeira tradicional asturiana, una pieza tradicional de Pakistán, y dos composiciones de Rigu, con igües del propiu gaiteru y de Dani Álvarez.
Sigui una balada al estilu propiu de Corquiéu, de nome «Sabes d’un llugar», con lletra de Xandru Martino: un cantar de calter más íntimu y escuru al principiu, que va abriendo hacia harmoníes más brillantes, p’acabar siendo un tema sele y con un puntu nostálxicu. Cuntaron nesti tema cola collaboración de Sergio Rodríguez, de Tutu Estudios, al baxu elléctricu, encargándose tamién de la producción y la parte técnica.
L’EP tien un doble interés, por ser la primer grabación del grupu na que participen la cantante Alba Gutiérrez, y la vigulinera Celia Nieto. Caúna dexa plasmao nesti trabayu la so destreza pa collaborar nes igües ya empastar dientro d’una formación con más de dos décades d’esperiencia.
«Cordobeyos» ye’l tema que zarra esti EP; amás de ser un tema preciosu, ye una novedá en cuanto a propuesta, al ser una canción dialogada ente Paul Balmori y la reciente incorporación a la formación, la cantante Alba Gutiérrez. La lletra tien nesti casu autoría doble: partes de Celso Amieva (del llibru Poemas de LLanes) y otres de Xandru Martino, y fae referencia a animales ficticios, mitolóxicos, de la zona de Llanes, nomáos «Cordobeyos». Nel tema, les partes cantaes dan pasu a un binariu tipo reel que pieslla de manera canónica, esplotando d’esta manera tolos recursos d’un grupu con muncha experiencia que mos confirma con esti llanzamientu qu’aquel estilu que va años dalgunos llamaben «folk cañón» sigui espiertu, dexándonos con ganes de sentir los temes en directu y cola esperanza de que la espera pa sentir el próximu discu nun seya demasiao llarga.
Suscríbite a les nuestres novedaes
