Del 6 al 10 d’agostu Tapia va ser la capital celta del occidente asturianu gracies al Festival Intercéltico d’Occidente (FID’O), Fiesta d’Interés Turísticu qu’esti añu aporta a la so edición númberu 29. Dende la organización tán entamando a anunciar la programación y, ente les actividaes adelantaes, alcuéntrase una verbena tradicional pal xueves 6 d’agostu y conciertos folk pa les nueches del vienres, sábadu y domingu.
La bandina Los Collaínos, la bandina Les Campes y el Grupu de Baille y Danza Ramón de Campoamor de Navia van ser les formaciones encargaes de poner música y baille tradicional la verbena del xueves 6. Dende les once la nueche, el Puertu de Tapia va acoyer les actuaciones d’estes trés formaciones.
Per otru llau, los conciertos folk van desenvolvese na Plaza de Campogrande con un formatu protagonizáu por una banda asturiana y otra internacional. Asina ye como’l vienres 7 toca’l tríu Picarós xunto a Xara -formación madrilana qu’inclúi pieces asturianes ente’l so repertoriu-; el sábadu 8 la mítica banda folk Corquiéu y el músicu bretón David Pasquet; y el domingu 9 NosOtrestres ponen la música de raigañu asturianu acompañaes pol grupu irlandés Backwest.
«Tres noites pra disfrutar dos artistas que chegan desde distintos rincóis, pra descubrir novos sonidos y pra compartir el ambiente único que se vive cada brao nel FID’O», valoraron dende la organización d’esti festival que tamién ta acabate d’asoleyar el cartelu de la 29ª edición d’esta cita imprescindible pa la música folk nel occidente’l país. Nos próximos díes van dir dando a conocer más actividaes de la programación.
Suscríbite a les nuestres novedaes
