El músicu y investigador Dani García de la Cuesta va facer esti xueves 29 a les 19h nel Muséu Nicanor Piñole un percorríu pela iconografía musical venceyada a a Xixón a lo llargo la historia. Garrando como puntu de partida les pintures d’autores como Piñole, el ponente va afondar cómo la música tuvo presente na vida cotidiana. Oxetos como los esquilones de la villa romana de Veranes, representaciones del arte románicu, pintures de los sieglos XIX y XX o creaciones artístiques más recientes, son dalgunes de les obres que De la Cuesta va analizar.
Amás d’esto, el músicu y investigador va reparar tamién nos instrumentos tradicionales qu’hai nel Muséu de la Gaita y va ufrir amueses musicales a mou d’ilustración de dalgunes de les obres, dando vida a los instrumentos que figuren nelles.
Esta actividá ta programada dientro del ciclu La colección al detalle que tien como oxetivu facer una visión multidisciplinar del fechu artísticu, analizando tolos factores que tienen una influencia determinante nel so desendolcu y proponiendo llectures nueves qu’integren la colección permanente del muséu.
Dani García de la Cuesta ye músicu y investigador. Ye collaborador, denve va más de cuarenta años, d’estremaes asociaciones musicales, d’etnografía y folclor, como La Quintana y La Instrumenta. Formó parte de grupos folk como Beleño, Merlín, Lliberdón. Caltién una actividá continua n’estremaos grupos y proyectos culturales con investigaciones, conciertos, presentaciones, talleres didácticos o alcuentros poéticos, y cunta con más d’una centena de trabayos publicaos al rodiu temática musical y cultura tradicional.
Suscríbite a les nuestres novedaes
