Ye innegable que cada vegada más grupos que nun davezu l’asturianu como llingua d’espresión anímense a cantar nesti idioma. Un exemplu nuevu d’ello ye’l de Milana Bonita, formación xixonesa d’indie-rock que ta acabante d’asoleyar ‘Dardu‘, un tema con una propuesta musical novedosa dientro de la música fecha en llingua asturiana. El cantar ve la lluz acompañáu d’un videu d’animación en YouTube y supón el tercer adelantu del primer discu que va asoleyar esti grupu.
«Fala del cansanciu colectivu que nos toca vivir, pero reivindicando’l poder que tenemos caún como individuu y recuperar cada llogru algamáu», despliquen Milana Bonita sobre esti tema qu’interpreten n’asturianu «por coherencia» y porque «la canción lo pidió». «Teniendo equí dalgo tan puru y vivu como vehículu d’unión del pasáu, presente y futuru», la banda decidió usar esti idioma tamién pa reivindicar «la vuelta a los raigaños, a la escencia del bon facer».
D’esta manera ‘Dardu’ tien «ritmu de tresillu» y espeya una sonoridá influenciada pol rock americanu na que la contundente base rítmica empastia perbién cola voz y los adornos de guitarra. Tamién aporta dándo-y pesu a la estaya audiovisual gracies al videu d’animación creáu pol ilustrador xixonés Mario Mercurio de Metro Cúbicu Studio. Too esto fai del cantar una pieza mui orixinal dientro de la música fecha n’asturianu. Amás, el grupu avisa: «soprendiónos l’acoyida en directo y los sentimientos qu’alcontramos cuando la tocamos, asina qu’ensin dulda habrá más temes n’asturianu«.
‘Dardu’ ye’l tercer y últimu adelantu del que va ser el primer discu de llarga duración de Milana Bonita. Esta banda nació en Xixón en 2020 y ta formada por Ana Belén León, Diego Fernández y Isaac Alonso, tres músicos que tienen esperiencia en formaciones anteriores rellacionaes col blues rock, la música clásica y el cantu llíricu. Tienen publicao seis cenciellos en plataformes musicales y lleven tiempu «trabayando con munchu ciñu» nel so primer discu homónimu que va ver la lluz en setiembre.
Suscríbite a les nuestres novedaes
