Últimu artículu, segunda metá del sieglu XX hasta anguaño. Nel mundu: Guerra Fría y más guerres. Pero vamos directamente a falar d’España y a marcar otra llinia imaxinaria, la que dixebra la dictadura de la monarquía parlamentaria; la democracia, anque en realidá les coses fueron más progresives. Porque mientres la dictadura, la represión foise “anidiando”: a partir de los 60 hubo detalles aperturistes, nótase en dellos compositores, en delles lletres. Y cola democracia fuéronse desaniciándose vieyes normes, pero sigue la inercia pa otres munches coses.
En dellos casos tamos conformándonos con trabayos que lleven paraos 100 años y nun faemos gran cosa por recuperar lo que queda, y toi falando de Torner y de lo dicho nel anterior artículu. Y tán saliendo trabayos nuevos maraviyosos, pero, ¿qué pasaría si fixéramos un equipu d’investigación ya interrellacionárase la información y les disciplines?, ¿si identificáramos los vacíos y estudiárense dende distintos ámbitos?… ehí queda. Y con esto dicho, entamamos.
«Tán saliendo trabayos nuevos maraviyosos, pero, ¿qué pasaría si fixéramos un equipu d’investigación ya interrellacionárase la información y les disciplines?»
Alan Lomax, americanu, yera fíu del etnomusicólogu John Lomax, y pasóse la vida cola maleta y la grabadora, asoleyó milenta ayalgues de decenes de países, y tien llibros onde afonda nos oríxenes del blues. Y por fortuna anduvo per Asturies nel mes de payares del 52, cola Guardia Civil siguiéndo-y los pasos por si esmolecía por daqué más que pola música. Arrexuntó equí un centenar de pieces y fíxonos un regalu impagable, qu’amás podemos atopar con facilidá n’internet y nel Muséu del pueblu d’Asturies, y fixéronse CDs… y que «lo que ye del pueblu, pal pueblu». Déxovos una xoya de xota tocada con trompa de boca.
Si vos dicía nel anterior artículu que nun hubiera un acercamientu al cancioneru de Torner que curiara les melodíes, que, a la mio manera ver, sacara la esencia, esti home ye una esceición pequena.
Foi un ciudadanu del mundu, fíu del músicu Joaquín Nin-Castellanos. Escribió trés colecciones de melodíes españoles pa pianu solu, Tonadas I, II ya III, y en toes metió daqué asturiano. Usó’l trabayu de Izenga, de Pedrell… y el de Torner pa la parte asturiana.
Joaquín desenvolvió un llinguaxe que respetó’l ritmu y les disonancies del panderu y de la payel.la, y l’ausencia d’una escala «temperada» nes melodíes faciendo pequenos «clusters» col mediu tonu, buscando la nota del mediu.
Déxovos el ‘Cantar del Pandeiro‘ de la so primer colección.
Ó Riada foi pianista (pianu, clave, bodhran), compositor y director, apostó y puxó pola llingua, la cultura y la música irlandeses con fuercia. Foi miembru fundador del grupu Ceoltóirí Chualann, y la banda sonora de la película Mise Éire, documental sobro la independencia d’Irlanda, foi la obra que lu punxo nel mapa. Usó nella melodíes tradicionales irlandeses y del estilu «sean-nós» -«estilu vieyu», que podríamos comparar coles nueses pieces cantaes ensin acompañamientu-.
Y d’esti «estilu vieyu» faló nel programa de radio que tenía nos ’60, Our Musical Heritage –La nuesa heriede Musical-, y dixo que tenía que sentise col interés y la mente llimpia d’un neñu pequenu, o como si escucháramos música india, porque nella hai formes, melismas, escales, que nun son habituales na música occidental reglada, y nun había que camudala, nun taba mal, yera asina, cuntaba la hestoria que tenía que cuntar.
Déxovos un exemplu de ‘Sean nós singing‘, buscái’l minutu 9:47, Kitty Gallager, va sonavos a cerquina. Y déxovos esta guapura a pianu solu, ‘Do Bhí Bean Uasal‘.
Michael foi alumnu de Sean O Riada, amaba fondamente la música irlandesa y siguió el llegáu de Sean, fíxolo mayor, fundó con Helen Phelan la Irish World Academy, una escuela d’estudios irlandeses que nun se centró en namás unos pocos aspeutos de la música irlandesa, non, fixo daqué muncho más grande, podéis echa-y una güeyada a la so páxina web.
Y dixo daqué nuna entrevista que me fixo de pensar y mirar escontra mi, porque yo tengo’l mesmu problema: «Equí toi, atascáu col instrumentu equivocáu pa tocar la música qu’amo. Nun toco la gaita, nin el whistle. Siempres voi tar atascáu, nunca voi ser un maestru d’esta música, namás soi un pianista«. Asina que dedicó la so vida a desenvolver el so propiu llinguaxe, suplir les faltes que sentía que tenía y a honrar la música qu’amaba. Ye pa mi un referente.
Déxovos un arreglu preciosu que fixo d’una pieza que s’atribúi a O’Carolan, ‘Eleanor Plunkett‘.
La música bretona lleva yá munchos años siendo respetada, cuidada y estudiada, tienen una «enciclopedia» y munchos llibros de munchos temes. Y esa trayectoria vese en músicos como Didier, que son el frutu d’esi trabayu.
Didier ye pianista y compositor, dende’l jazz, la música clásica y la bretona, entemez tou y fai guapura. Otru referente.
Déxovos dos exemplos, ‘Tri martolod‘ col cantante Yann-Fañch Kemener; y la ‘Suite de gavottes des montagnes‘ pa pianu solu, que son trés gavottes enllazaes -les gavottes son un tipu de dances en corru, y Montagnes, una zona de Bretaña-.
Xosé y Ramsés son un equipu de músicos y recopiladores de música tradicional asturiana qu’arrincaron nos años ’90 -Xosé-, y que sigue n’activo rescatando material etnográficu y etnomusicolóxicu per tola xeografía asturiana, y depositándolo con ciñu dientro del so archivu ATOAM -Archivu de la Tradición Oral d’Ambás-.
Tán comprometíos cola so divulgación al traviés d’artículos, charres, talleres, les xuntances de baille tradicional Nueche en Danza, publicaciones monográfiques de la música tradicional de conceyos como L.lena, Quirós o Ayande… y nos programes de la RTPA: Camín de cantares, Camín y Siguir en camín, que constituyen a estes altures, con más de 200 capítulos, una de les series etnomusicolóxiques de trabayu de campu, más importantes de la península Ibérica.
Ramsés Ilesies difunde bona parte d’esti patrimoniu cola enseñanza en distintes escueles de música tradicional de Cangas del Narcea, Avilés, Uviéu y Xixón.
Amás d’esto, Xosé Ambás, cantante y enfermeru, formó parte de grupos como N’Arba o Tuenda nos que non yá apurre melodíes y lletres, sinón que da’l sentíu, el por qué, el llugar qu’ocupa na hestoria’l patrimoniu del que venimos. Con Tuenda -con Pepín de Muñalén y Elías García-, sacaron trés discos que son trés pegoyos de la cultura asturiana; déxovos una pieza del primeru (2005): ‘Non, Non, Maruxa‘.
Na actualidá tien otru proyectu en marcha, Buír -con Pepín de Muñalén y una servidora-, y d’esto déxovos el ‘Cantar d’arrolar de Piorno‘, grabada nel conciertu de presentación el 14 de payares de 2025.
Pero amás, frutu d’esti trabayu, munchos artistes asturianos pudieron incorporar nel so repertoriu pieces rescataes por ellos. Hai decenes d’exemplos, déxovos ‘Milia‘, una pieza de Mapi Quintana y Elías García, del discu Severina (2014). El buzuqui de Elías tuvo presente nestos artículos dende’l primeru, formó parte de Llan de Cubel, de Felpeyu… y dexónos y dexó furacu, como Igor Medio, como munchos otros grandes…
Dame pena pensar tolo que quedó fora, tola xente grande que nun menté, costóme enforma decidir qué poner y qué non… si echáis coses de menos, ye normal, yo tamién, pero espero que sirvieren estos artículos pa semar la grana del interés y que sigáis vos. Un abrazu fuerte.
Suscríbite a les nuestres novedaes
