Col arranque de la Selmana Santa La Pola va acoyer la fiesta de los Güevos Pintos, que vien acompañada del tradicional Mercáu Polesu, eventu nel que la música asturiana tien un papel cimeru. El Parque Alfonso X El Sabio va convertise nun espaciu de folcor, artesanía, música y teatru. El Ventolín, la Banda Gaites Xiranda, Los Gascones, Baxel, Picarós, Alicia Villanueva & Luis Pola, De Cotía van protagonizar les actuaciones dientro d’un programa nel que tamién va haber Cancios de chigre, Tarde en Danza y animación del mercáu con pareya de gaita y tambor.
El Ventolín y la Banda Gaites Xiranda actúen el xueves 17 de 17h a 21h); los pases de la bandina popular Los Gascones van ser del vienres 18 al domingu 20 ente les 12h y les 15h y de 17h a 21h; los conciertos folk van ponelos Baxel (vienres 18 a les 19.30h) y Picarós (sábadu 19 a les 19.30h); mentes que l’asturianada d’Alicia Villanueva & Luis Pola va sonar el domingu 20 a les 13.30h. Pa completar la programación va haber Cancios de Chigre a dende’l xueves 17 al llunes 21 a les 21h y el domingu a les 19h hai Tarde en Danza y Danza Prima con De Cotía.
Los encargaos de zarrar la programación son El GFI El Ventolín, qu’animen el mercáu el martes 22 de 17h a 21h amestando esta programación a la XLIV Selmana del Folclor Astur qu’entama esti colectivu ente’l 21 y el 26 d’abril.
Suscríbite a les nuestres novedaes
