El Conceyu de Ribeseya reconoz a Corquiéu como “Embaxadores de Ribeseya”

Conciertos per Hungría, República Checa, Eslovaquia, Alemania. Luxemburgo, Bélgica, Italia, Dinamarca… Nos sos 25 años de trayectoria Corquiéu pisaron más de 16 países y actuaron en prestixosos festivales como’l Celtic Connections d’Escocia o l’Intercélticu de Lorient. Tamién ye ún de los grupos asturianos que más oyentes internacionales tien nes plataformes dixitales, con una repercusión bultable en llugares como Xapón, onde acumulen en 4 años y mediu más de 700.000 reproducciones y más 200 referencies vendíes . Por too ello, el conceyu de Ribeseya los premió’l pasáu xueves 5 cola distinción d’Embaxadores de Ribeseya.

«Considerámonos mui afortunaos de que’l pueblu onde vivimos reconoza la nuestra carrera y tolos años de trabayu que ficimos llevando siempre’l nome de Ribeseya per delantre», comenta Paul Balmori, bouzuquista de Corquiéu a la hora de valorar el premiu. «Cuando entamamos col grupu yéremos chavales -yo tenía 17 años- y ensayábemos na playa de L’Atalaya porque nun teníemos llocal», añade’l músicu matizando que los llamaben d’aquella «los Cinco de L’Atalaya». D’ellos, anguaño namás tán na banda Rigu Suárez -gaiteru y whistle– y el propiu Balmori, por eso ésti dedica’l premiu a los otros componentes orixinales colos que formaben los Cinco de L’Atalaya -Pablo Valdés, Iván Vega y el fináu David Mateos “Puru”- y a la cantante Gema García qu’aportó llueu «pol esfuerzu que fixeron nel so día por llevar la música de Corquiéu per toa Europa»; a la demás xente que pasó per esta formación y a los actuales componentes: Jorge Ibáñez, Blanca Sáenz, Dani Álvarez, José Rodríguez y Lluci G. Palomares.

Con esta distinción que-yos entregó’l Conceyu Ribeseya na I Gala de Turismo, vuelve a amosase’l potencial que tien la música asturiana como reclamu turísticu y cómo entemecer con xeitu polítiques musicales y turístiques pueden dar resultaos afayadizos. Corquiéu punxeron al so conceyu y a Asturies nel mapa con actuaciones en más de 16 países y cantares como Ribeseyana sonaron en más de 100 países a traviés de les plataformes dixitales. Porque la música asturiana atrái a la xente de fuera y los músicos del país son de los meyores embaxadores que pue tener Asturies.

Mercar discos de Corquiéu y Baxel