Otra vegada más, y yá van cuatro. Yá tán toles entraes vendíes pal IV Semando Fest que se celebra esti fin de selmana n’Uviéu con dos cites: la primera ye una Jam Session Moza n’andecha col colectivu Caricós, tien entrada llibre y celébrase güei vienres a les 22h en L’Esperteyu; la segunda ye’l conciertu del sábadu en Lata de Zinc nel qu’actúen Lucía Rojo + Fruela 757, Entós, PVXARRA y Rellume.
«Tamos mui contentos pol cuartu Semando Fest nel que s’agoten les entraes enantes del propiu festival, pero sobre manera esti añu queremos destacar la venta de la entrada moza, con datos qu’algamen casi’l 40% de venta d’esi tipu d’entrada, dalgo qu’otros años costaba más consiguir. Más allá d’eso, esperamos una nueche con bon ambiente y con propuestes estremaes na que la xente esfrute de la música moza fecha n’asturianu», valoren dende Héroes Ensin Nome, organizadores del eventu esti añu tres dar relevu musicasturiana.com y Ixuxú Cultra nesta xera.
El cartelu d’esta cuarta edición inclúi actuaciones de dellos proyectos musicales. Los grupos confirmaos son Rellume, un proyectu con raigaños na música tradicional; Entós, un tríu de folk de cámara con influencies variaes; PVXARRA, banda qu’entemez punk, hardcore y electrónica y la tonada lletrónica de Fruela 757 y Lucía Rojo apocayá anunciáu como parte del programa del festival.
Semando Fest ye un eventu que busca ser más qu’un conciertu y por eso tien una filosofía caracterizada por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’una actuación; que reivindica les sales de conciertos como un espaciu afayadizu pal exposigue de la música de raigañu; y qu’apuesta por da-y oportunidaes a les y los creadores xóvenes.
La iniciativa nació en 2023 y nella participaron el dúu d’asturianada Alicia Villanueva y Luis Álvarez Pola; el tríu de folk de cámara Loína; les pandereteres Algaire y el dúu d’electrónica de raigañu Llevólu’l Sumiciu. Cecilia Díaz foi l’autora del cartelu y la identidá visual, mientres que les semeyes y el videu resume del eventu fueron obra de Lucía Garó. Yedra Riesgo y Raúl Alonso –responsables del programa radiofónicu Héroes Ensin Nome– fueron los encargaos de presentar l’eventu.
En 2024 xubieron al escenariu Sandra Álvarez y Noemí González col so espectáculu de poesía feminista y tonada -qu’anguaño preséntase como Milfueyes-; Mostru l’Horru col so rap combativu; la banda de folk celta Guieldu y el grupu de punk-rock Ochobre. Beatriz Menéndez –alter ego de Made in Chigre– foi la responsable de tola parte gráfica y Leticia Cernuda de les semeyes y del videu. Héroes Ensin Nome repitieron como presentadores.
Yá en 2025, foi’l turnu nel escenariu pa la percusión y les voces d’Abéu, la propuesta novedosa con una montonera de xéneros estremaos de Ferla Megía, el power folk d’Alienda nel so décimu aniversariu nos escenarios magar de la so mocedá y la banda de post-rock Melandru. L’artista Surimi, –nomatu de Paula Suárez– encargóse de la identidá visual, mientres que Nay Semeya fixo lo propio coles semeyes y la realización audiovisual. Héroes ensin nome repitieron na presentación.
Semeya de Leticia Cernuda nel II Semando Fest al final de l’actuación de MilFueyes.
Suscríbite a les nuestres novedaes
