Más de 3.000 kilómetros, seis instrumentistes, cinco díes, cuatro conciertos y dos formatos. Yá ta too preparao pa l’entamu de la xira de LaGuinda, banda fundada en Francia pola avilesina Ana Pereda (Filanda) qu’entemez música asturiana, llatino-americana y de la Isla de la Reunión. Teberga, Nava, Uviéu y Avilés son les paraes d’estos conciertos gratuitos nos que van poder sentise en directo, per primer vez, temes como ‘Pandeiru‘ y ‘Morenina‘.
La xira arranca en trío con dos paraes: la Taberna Narciso de Teberga (vienres 22 a les 22.30h) y L’Apiaderu de Nava (domingu 24 a les 14h). «Esti formatu ye LaGuinda más intimista y nél damos muncha más importancia a les voces, a les armoníes vocales que son les que dan cuerpu al directu», desplica Pereda sobre un formatu del qu’asegura disfrutar muncho pola so cercanía.
«El sestetu ye LaGuinda a tope porque s’añaden saxu, trombón y la guitarra eléctrica; faen unos solos que presten pola vida, y tien una parte mui jazzera», comenta la vocalista del formatu col que van actuar nel Kuivi PopUp d’Uviéu (llunes 25 a les 21.30h) y nes fiestes de San Agustín d’Avilés, nel Parque del Muelle (martes 26 a les 22.30h). Son dos formatos estremaos pero con un puntu d’alcuentru: «música pa tresmitir, buscar la emoción y crear baille, risa, llantu y que too esto puea xuntase nun conciertu», añade l’avilesina.
«Vamos facer 3.000 kilometros d’ida y vuelta en total; entós a nivel de sostenibilidá, d’ecoloxía y lóxica, nun podíemos venir namás pa una fecha. Por eso intenté tocar en tolos llugares que nos dexaron«, desplica Ana Pereda sobre esta xira na que va actuar en llocales referenciales pa ella: «Narciso ye como mio casa, porque equí ta mio hermana y cuando vengo p’Asturies vengo pa Teberga; en Nava tengo munches ganes de facer la sesión vermú; el Kuivi ye un llugar mui prestosu que me paez un lluxu qu’exista y Avilés ye tocar na mio casa, y pa mín ye un arguyu».
Sicasí, nun too ye cenciello. La cabezalera de LaGuinda desplica qu’hai «muncha diferencia ente’l tratu en Francia y España a la hora de poder vivir de la música» y qu’equí «hai muncha precariedá«. «Toi viniendo con un grupu francés, los salarios de Francia son más altos y les condiciones d’acoyer a un grupu que fizo 3.000 kilómetros más cares que si namás faen 30 o 50 kilómetros, asina que la xira probablemente va salime a pagar«, comenta l’avilesina sobre estos conciertos qu’arriesga a facer «como un homenaxe a mi y a la mio xente«, amás de como un primer pasu «pa poder volver a tocar n’Asturies en meyores condiciones».
Nesti sen, la música fai un llamamientu a que les instituciones públiques dean más sofitu a la música en vivo y a los pequeños llocales qu’entamen conciertos pa qu’estos puedan puxar más «polo llocal y pol arte y algamar qu’haiga una rede d’artistes llocales asturianos» que puedan trabayar en meyores condiciones. Mentanto, el pueblu salva al pueblu y Ana Pereda fai un anima a que’l públicu vaya ver a LaGuinda a tolos conciertos, a sofitar los espacios nos que van poder tocar y asina «cumplir el suañu de poder venir y tocar en casa».
Suscríbite a les nuestres novedaes
