Esti miércoles 7 de mayu a les 19h La Lechera de Cancienes (Corvera) va acoyer una edición nueva de Versovera, recital de poesía que dende va una década se fai nesti conceyu con motivu de la Selmana de les Lletres Asturianes. Amás de la participación de los y les poetes Berto García, Aida Escudero, José Luis Rendueles, Ánxela G. d’Ávila y Pablo Rodriguez Medina, la música va garrar protagonismu cola actuación del grupu hiphop Mostru l’Horru, que va aprovechar la ocasión pa estrenar dalgún tema que va formar el so próximu discu, del que tienen «intención que salga esti añu».
«Caltenemos la esencia del rap, pero hai un desplazamientu claro na mestura con otros estilos. Va ser too más baillable y animao», comenta Fran Méndez sobre’l segundu álbum que va asoleyar tres estrenase en setiembre de 2022 con Señales de Fumu. Otra de les novedaes próximes de Mostru l’Horru ye que van «sumar cuatro nuevos músicos» al tríu qu’anguaño formen Zeros (guitarra y coros), Jotadejota (DJ) y el propiu Fran a la voz. Nesti sen, declara que la so intención «siempre foi montar una banda» pero qu’en Corvera van tocar «los tres de siempre».
Col «discu bastante avanzáu«, l’actuación del miércoles va servir pa «da-y un adelantu a la xente que vien al conciertu» y tamién por ellos mesmos, yá que como reconoz el raperu: «nun somos capaces de guardalo en secreto». A les 18h en Cancienes van poder sentise dalgunes d’estes novedaes, amás de los temes clásicos de la única formación de rap n’asturianu qu’anguaño ta n’activo y con proyección de futuru.
Suscríbite a les nuestres novedaes
