El rap de Mostru l’Horru, segunda confirmación del II Semando Fest

Dempués d’anunciar la selmana pasada la primer confirmación del II Semando Fest –Sandra Álvarez y Noemí González, que van ufrir un recital qu’axunta tonada y poesía feminista contemporánea-, el festival de música moza n’asturianu desvela’l segundu nome: Mostru l’Horru. El proyectu de rap n’asturianu encabezáu pol MC Fran Méndez en compañía del productor Zeros, va poner rimes comprometíes enriba l’escenariu de Lata de Zinc el 9 de febreru.

Esti festival entamáu por Musicasturiana.com y Ixuxú Cultura sigue apostando por reflexar la diversidá de la música n’asturianu. Asina ye como al cartelu súmase Mostru l’Horru, proyectu formáu en 2021 pol xixonés Fran Méndez y que tuvo nomináu al XIV Premiu Camaretá al Meyor Cantar con “Fíu d’un pueblu”. Nos sos cantares hai unes lletres de fondu componente social que s’amesten a unes bases hiphop nes que tamién suenen influyencies d’otros estilos como’l reggae o’l rock.

Xunto a Sandra Álvarez y Noemí González y a otros dos nomes entá por confirmar, Mostru l’Horru va tocar el vienres 9 de febreru na sala uvieína Lata de Zinc. Precisamente’l Semando Fest reivindica les sales de conciertos como un espaciu afayadizu pal espoxigue de la música de raigañu, porque normalmente’l públicu ta avezáu a ver actuaciones gratuites de música asturiana en praos, teatros, pela cai… pero hai mui poques en sales de conciertos, polo que’l festival quier puxar por estos espacios fundamentales pa la música

Dexa un comentariu

X