El tsunami del punk-rock n’asturianu

Xueves 27 de xunetu. Cinco y cinco minutos de la tarde. Fai calor, muncha calor; el sol pega de frente, calienta cares, pescuezos y l’asfaltu del Parque Los Hermanos Castro. La xente asturiano nun tamos avezao a esti tipu de tortures climátiques y podríemos consideralo un castigu. Pero suenen les primeres melodíes de “Bombes” y escaecémoslo too. Yá sintiéremos daqué un ratín enantes, col punk oscuru de Viuda inaugurando’l festival y interpretando la so “Alleraná” na llingua’l país, pero ye con Misiva con quien se desata esi tsunami pol que tábemos naguando; el del punk-rock n’asturianu. Los de Grau entamaron a disparar enriba l’escenariu principal del Tsunami Xixón ráfagues de punk, de rock, de reivindicación antifacista y feminista, de llucha pol reconocimientu de los nuestros derechos llingüísticos, de solidaridá coles 6 de La Suiza. Y nesi llau de la barricada diben tar acompañaos a lo llargo la xornada por Mala Reputación, por Desakato y por un públicu entregáu.

El día, la hora y el clima yeren adversos pa ver a Misiva, que xubíen per primer vez a ún de los escenarios destacaos del TXF pesie a llevar 10 años tocando y tener ocho referencies publicaes ente discos, EP y singles. Sicasí, ellos saben lo que ye tar “En Pie de Xera” y concentraron a cientos de persones que resistieron a estes inclemencies festivaleres. Y pagó la pena. Los moscones dieron un conciertazu rápidu nel que presentaron el so trabayu nuevu, Mala Relixón, y repasaron cantares de tola so discografía, Algamaron qu’esconsonaren ente’l públicu los pogos, los circle pit y les “muries de la muerte” y tamién desafiaron a les amenaces de VOX, nuevos xestores de los eventos festivos del Ayuntamientu de Xixón. Los ultras nun queríen “plataformas de apoyo a la cooficialidad” nos escenarios de la ciudá, pero una pancartona pola “Oficialidá” de la Xunta Pola Defensa de la Llingua Asturiana esnaló mentanto Misiva tocaben “Foriatu na mio ciudá“, siendo esa la primer acción reivindicativa de les que taben por llegar esi día. Con Humber Sierra nadando penriba d’un públicu desbocáu acababa’l conciertu y a la fola d’esti tsunami yá nun diba abocanar

Dempués de l’actuación de Fe de Ratas -mítica formación punk-rock avilesina que tampoco escaeció la solidaridá con otres causes sociales nel so reivindicativu directu-, aportaba’l turnu de Mala Reputación nel escenariu principal. Los 45 minutos que tocaron los de Cangues d’Onís pasaron volando gracies a la calidá del so espectáculu y a un repertoriu que fizo equilibrios con xeitu ente lo que se pue considerar les dos etapes del grupu: l’anterior y la posterior al discu Eternas Promesas (2015); o lo que ye lo mesmo, un soníu averáu al punk-rock estatal o otru más rockeru, con influencies más internacionales y hasta cortexos con sonoridaes más alternatives. Preste más una o otra dómina, Mala Reputación sigue siendo’l mesmu grupu que lleva cuasi 30 años pariendo temazos y eso notóse nesti conciertu enllenu d’intensidá, d’emotividá y con milenta persones entregadísimes. Na so actuación siguió combatiéndose a la intolerancia dende les trincheres de la música; el colectivu Asturies Insumisa xubió con una pancarta col llema “Asturies Feminista y Antifacista” y, anque Mala Reputación nun tocaron nengún de los sos temes n’asturianu, falaron na so llingua materna y reivindicáronla. Los xiblíos de “Ceremonia” zarraron el show a les siete y media la tarde; agora tocaba esperar cuatro hores pa que xubiera otra vegada la marea del punk-rock n’asturianu. Y vaya si xubió.

Yeren ún de los cabezaleros del cartelu del festival; yera ún de los últimos conciertos que tán dando na so xira de despidida; yera l’alón a los escenarios d’Asturies. Tamién yera un homenaxe a 10 años d’un camín ascendente, qu’apuntaba imparable y nel que namás hubo una cosa que lu frenara; la decisión del propiu grupu de dexar la so actividá. Por estes razones y munches más, miles de persones taben esa nueche preparaes pa glayar, baillar, sudar, reír, berrar, blincar, cantar, abrazar y una montonera d’acciones y emociones más gracies a lo que foi, ye y será Desakato. Fueron 25 himnos interpretaos a lo llargo de cuasi dos hores nos qu’hubo de too: trallazos qu’afalaron a facer xabaces pogos, circle pits y muries de la muerte; balades; medios tiempos; emotivos discursos; llárimes; collaboraciones; un amiestu de toles pancartes y reivindicaciones… Desakato repasaron tola so bayurosa y variada discografía y incluso recuperaron pa la ocasión dalgún de los temes que nun suelen tocar nos sos directos como “Los Mineros“, precedíu d’un sampler con una tonada y cola pancarta pola oficialidá desplegada otra vegada más y amosando asina a VOX que cuando escupen cae-yos enriba. El conciertu foi munches coses difícil describir con pallabres, un auténticu tsunami qu’arrasó col fueu qu’había ente’l públicu cuando los componentes de Misiva, Mala Reputación y collacios íntimos de Desakato xubieron al escenariu pa cantar “Pánico en Frankfurt” y los de Llanera despidiéronse asina de la so xente y del so país. La folona que llevantaron dexó regueros d’arguyu, de dignidá, de compromisu y de señaldá.

Col pasu los díes y les pulsaciones furrulando al so ritmu normal, la xornada vivida’l xueves 27 nel Tsunami Xixón da llugar a delles reflexones. Una: el rock n’asturianu tien calidá abondo y xenera una bona respuesta per parte’l públicu de dientro y fuera d’Asturies, como amosó’l conciertu de Misiva nunes condiciones tan complicaes. Por eso ye de xusticia que’l TXF apueste más por grupos d’esti movimientu musical y puea vese a formaciones como Dixebra, Skontra, Skama la Rede, La Tarrancha o Ochobre poniendo pates arriba a la xente’l festival nunes condiciones afayadices. Dos: el Tsunami Xixón ha quedar en Xixón. A causa de la polémica xenerada cola reunión de los organizadores del eventu col responsable nuevu de Divertia na sede de VOX, bilordióse sobre la posibilidá de qu’esti eventu nun vuelva facese nel so llugar natural. Podrá cuestionase, discrepase o ignorase la xestión d’esti asuntu, pero les bronques xeneraes dende la comodidá de les redes sociales y los ataques inxustificaos de “fueu amigu” que sufrieron dalgunos comprometíos políticamente, pueden xenerar efectos non deseaos; y que’l TXF marche d’equí sería una grave perda cultural, económica y social pa la ciudá, pa los grupos d’Asturies y pa los siguidores d’esta música. Tres: que la ultraderecha xenera conflictos onde nunca los hubo; les sos intenciones de torgar la lliberta d’espresión y la diversidá llingüística tán teniendo respuestes dende munchos frentes, y nel propiu Tsunami incluso grupos foriatos como La M.O.D.A o ZOO reivindicaron la oficialidá del asturianu, espardiendo’l sofitu pa cola nuestra llingua ente miles de persones llegaes dende munchos sitios. Vémonos en 2024, naguando por que siga espardiéndose esta fola del punk-rock n’asturianu y de solidaridá.

Más semeyes feches por Pablo Fernández

Discos de rock n’asturianu a la venta na tienda