L’Ayuntamientu de Gozón y l’Asociación cultural Grupo Danzas de Luanco organicen la Muestra de Música y Danza Popular de Lluanco, qu’esti añu aporta a la so quinta edición. La cita va ser el esti sábadu 19 d’agostu, a partir de les 22:30 hores, na Torre del Reló y nella participa’l propiu Grupo de Danzas de Luanco yles bandines tradicionales Los Gascones y Las Pamplinas d’El Bierzo.
El Grupo de Danzas de Luanco nació’l 12 de marzu de 1980 en Lluanco. Fueron les muyeres de l’Asociación Amas de Casa de Luanco les qu’entamaron esti camín. La formación esntamó siendo namás pa la reciella, entendiéndola como una actividá estraescolar pa los neños y neñes. Nel añu 2000 creóse’l grupu de mayores a iniciativa de dalgunos de los padres y madres. Asina ye que daqué qu’entamó con una simple afición, llegó a convertise nun grupu con delles décades d’historia y que tien un repertoriu de bailles tradicionales de tola xeografía asturiana: xotes, muñeires, xiraldiyes, dances… Amás, nel 2021 surde, dientro de l’asociación, un grupu de pandereteres de toles edaes que tienen l’oxetivu de deprender y difundir canciones tradicionales y populares del país. L’agrupación tien actuao dientro y fuera d’Asturies nestos 43 años de camín y lleva cinco años entamando esta Muestra de Música y Danza Popular de Lluanco.
Per otru llau, Los Gascones ye una bandina popular formada en 2016 mui destacada por interpretar tanto temes tradiciones como adaptaciones de cantares mui conocíos del pop, el rock y músiques populares de tolos tiempos. Xunto a les formaciones asturianes va tar acompañando Las Pamplinas, bandina tradicional d’El Bierzo que recupera la música y estética de les formaciones qu’existieron nesa rexón la primer metá del sieglu XX.
Suscríbite a les nuestres novedaes
