Una xornada completa de grabación nel OVNI Estudio de Llanera, una mezcla profesional y edición de dos de los temes y un conciertu nel VESU 2027 con un caché de 500 euros. Too esto forma parte de la primer convocatoria de Valta La Muria, iniciativa llanzada por Music Monsters -asociación qu’entama esti festival carbayón- pa puxar pola música emerxente. A ella pue presentase hasta’l 8 de setiembre cualesquier proyectu musical que tenga componentes con una media d’edá menor de 30 años y polo menos dalgún integrante que naciera o viva n’Asturies.
Les bases yá tán publicaes y la inscripción puede facese yá nun formulariu en llinia, nel que va haber qu’incluyir una descripción del proyectu y dos muestres musicales: una en formatu MP3 y otra en formatu audiovisual, al traviés d’un enllaz de YouTube, Google Drive o plataformes asemeyaes. Dende la organización recalquen qu’esta iniciativa ta destinada a bandes y solistes de cualesquier xéneru y formatu.
La escoyeta va tar al cargu del equipu de dirección de VESU, que va valorar aspectos como la composición, la interpretación, la propuesta estética, la presencia escénica y el calter performativu de cada candidatura. Les sesiones de grabación tán previstes pal mes d’ochobre de 2026 y l’actuación nel VESU va ser na edición de 2027 del festival, que suel celebrase a finales de xunu.
Con esta convocatoria, VESU reforcia’l so compromisu cola creación musical independiente y fai un apueste por sofitar la música emerxente fecha n’Asturies, dando la oportunidá de xubir a ún de los festivales con más sonadía del xéneru y grabar nún de los estudios de grabación más destacaos del país.
Suscríbite a les nuestres novedaes
